Në kuadër të vizitës bilaterale në Izrael, zëvendëskryeministrja dhe Ministrja e Punëve të Jashtme, Donika Gërvalla, vizitoi dje parlamentin e Izraelit ku u takua me përfaqësues të ndryshëm të Knesset-it.
Në njoftimin e MPJ-së thuhet se gjatë takimit me Ram Ben Barak, kryetar i Komisionit për Punë të Jashtme dhe Mbrojtje, ministrja Gërvalla nënvizoi natyrën e veçantë të marrëdhënieve mes Izraelit dhe Kosovës dhe bëri një përshkrim të mundësive dhe nevojës për zgjerimin dhe thellimin e mëtejshëm të tyre në të ardhmen.
Theks i veçantë u vu gjatë bisedës në sfidat gjeopolitike të krijuara nga lufta ruse në Ukrainë dhe rrezikun e destabilizimit të Ballkanit Perëndimor.
Tutje bëhet e ditur se Gervalla është takuar edhe me ministrin e Jerusalemit Zeev Elkin.
“Rreth një përfshirjeje më të mirë dhe efektive të gjeneratave të ndryshme të diasporës dhe mërgatës, ajo diskutoi me z. Zeev Elkin, Ministër i Jeruzalemit dhe Trashëgimisë. Ministrja Gërvalla theksoi se Kosova mund të përfitojë shumë nga përvoja e gjatë dhe mbresëlënëse e Izraelit në këtë fushë”, thuhet në njoftim.
Kurse në takimin me Kryetarin e Grupit të Miqësisë Izrael – Kosovë, Ali Salalha, ministrja Gërvalla ka theksuar nevojën e një bashkëpunimi më të dendur parlamentar mes Knesset-it dhe Kuvendit të Kosovës.
“Delegacioni i Republikës së Kosovës, e përfundoi ditën me një pritje në Ambasadën e Republikës së Kosovës në Jerusalem, ku morën pjesë përfaqësues të ndryshëm të ekonomisë dhe shoqërisë izraelite, si dhe përfaqësues të diasporës shqiptare në Izrael. Përfaqësuesja e Republikës së Kosovës në Izrael, Ines Demiri, gjatë fjalës së saj përshëndetëse vuri në pah në veçanti frymën shumë miqësore të marrëdhënieve mes Izraelit dhe Kosovës dhe theksoi poten Zeev Elkin cialin e madh të bashkëpunimit në të ardhmen”, thuhet tutje në njoftim.
