Këtë rrëfim ajo e bëri në emisionin “Infonata” në Tëvë1, ku tha se Ukshinin e ka vizituar në disa burgje qoftë në Kosovë e Serbi, pasi ajo thotë se veprimatin Ukshin Hoti, regjimi serb e ka lëvizur nga një burg në tjetrin.
“E kanë shëtitur nëpër burgje të ndryshme, duke filluar nga Kosova e deri në Mitrovicë të Sremit, kemi shkuar së bashku me Hakiun (bashkëshortin) më 12 shkurt të vitit 1999. Ne i kemi pasur vizitat e tmerrshme sepse nuk na kanë lejuar të flasim mes vete në gjuhën shqipe, por duhet të flisnim në gjuhën serbo-kroate. Ukshini nuk ka pranuar të flasë në këtë gjuhë, dhe më kujtohet si sot rasti kur shkova në vizitë e ishte edhe djali i Ukshinit, Andini, dhe e kishin ndaluar të flisnim gjuhën shqipe tërësisht dhe më kujtohet kur ai e ngriti dorën përpjet edhe tha “kurrë në jetën time nuk dua ta nënçmojë gjuhën e nënës time, e të flas gjuhë të huaja”, e pas kësaj shkoi e nuk e biseduam asnjë fjalë”, tha Hoti.
Hoti tutje tregoi se pas vizitës së fundit në burg nuk ka pasur më asnjë kontakt me Ukshinin, teksa kujtoi se në herën e parafundit kur e ka parë atë ishte tmerrësisht i maltretuar.
Ndërkaq, ajo tha se asnjëherë nuk ka marrë ndonjë lajm se Ukshin Hoti nuk jeton, përveç fjalëve që ai është ende gjallë.
“Më pas kam shkuar edhe në vizita tjera çdo muaj, por vetëm 5 minuta ka zgjatur vizita për shkak se ai nuk donte të fliste në gjuhën serbe, e unë nuk e njoh mirë këtë gjuhë. Në herën e parafundit Ukshinin e kam parë tmerrësisht të maltretuar, ndërsa në herën e fundit pakëz më mirë ka qenë, por gjithmonë ka qenë i pakënaqur. Pastaj ra NATO-ja, kërkova përmes Maqedonisë të shkoja në vizitë, por nuk ma mundësoi askush, kështu që pas kësaj më kontakte nuk kam pasur. Mirëpo kam pasur kontakte me faktorin ndërkombëtar, me Shqipërinë, me Maqedoninë, me qeveritë tona që janë ndërruar herë pas here, por asnjëherë nuk më është thënë se Ukshin Hoti nuk jeton, dhe deri më tani nuk asnjë argument përveç fjalëve që më është thënë se Ukshini është i gjallë”, u shpreh ajo.
