Në afërsi të pikës kufitare në Jarinjë sot janë vendosur disa autoblinda të Policisë së Kosovës, pasi që në anën tjetër të kufirit janë mbledhur disa motoçiklistë në shenjë proteste.
Lidhur me këtë, ish-ministri i Punëve të Brendshme, Bejtush Gashi, thotë se raste të tilla për të krijuar incidente janë të gatshme gjithmonë.
“Raste të tilla për me kriju incidente gjithmonë janë të gatshme. Paralajmërimi i ardhjes është bërë edhe nga mediat serbe, kështu që në këtë drejtim Policia ka përgjegjësi që të reagoj dhe të moj lejojë që të krijohen incidente, që pastaj mund të përshkallëzohen. Ka kapacitete edhe forca që të parandalojë incidente që mund të krijojnë këto grupe, në këtë drejtim masat që Policia i ka ndërmarrë jam shumë i sigurt që janë më proporcionalitet me forcat që kërkohen për ta parandaluar një provokim të tillë”, tha ai në emisionin “Ditari” në Tëvë1.
Gashi thotë se në këtë rast, Policia e Kosovës nuk është e nevojshme të konsultohet me NATO-n, pasi që sipas tij ky organ i drejtësisë ka përgjegjësi për të garantuar siguri dhe për të parandaluar ekseset që mund të ndodhin atje.
“Mbështetur në specifikat dhe përgjegjësitë që misioni i NATO-s ka në atë pjesë, realisht vendimet duhet të konsultohen. Në rastin konkret jo, për faktin se Policia e Kosovës ka përgjegjësi të drejtpërdrejtë për të garantuar siguri dhe për të parandaluar ekseset që mund të ndodhin. Kështu që është një operacion rutinor dhe obligues i Policisë së Kosovës që të reagojë për parandalimin e konflikteve. Kur janë operacionet e përmasave të tilla atëherë konsultohet edhe misioni i NATO-s që është i pranishëm aty”, tha ish-ministri i Punëve të Brendshme.
Sipas tij, për këtë rast Policia e Kosovës është e këshillueshme të komunikojë me NATO-n, por jo detyrimisht e obligueshme.
“Në këtë drejtim të gjitha operacionet dhe veprimet që ndërmerren në atë pjesë Policia është e këshillueshme, por nuk është e obligueshme që ta informojë, edhe pse kanë komunikime të rregullta kur parashikimet janë se mund të ketë ndonjë reagim nga ana e qytetarëve, të cilët janë në atë pjesë, normal që edhe misioni i NATO-s atje informohet”, shtoi ai.
Rreth situatën në Jarinjë, teve1.info ka kontaktuar zëvendës drejtorin rajonal për veriun e Kosovës, Veton Elshanin, i cili tregoi që i është ndaluar hyrja një numri të motoristëve që ishin nisur në drejtim të Kosovës.
Elshani, tha se kjo është bërë për shkak të që rendi dhe qetësia publike të mos prishet.
“Për shkak të mundësisë që rendi dhe qetësia publike të prishen, ne i kemi dërguar njësitë adekuatë që janë për menaxhim të turmave në pikën kufitare në Jarinje dhe këtyre motoçiklistëve i është ndaluar hyrja në territorin e Kosovës”./teve1.info/
