Politologu, Avdi Smajljaj ka vlerësuar se Partia Demokratike e Kosovës (PDK) duke mos e rikandiduar, Ramiz Lladrovcin për kryetar të Drenasit mund të ketë kalkuluar se në këtë komunë e ka një fitore të sigurt, pavarësisht kandidatit.
Ndërkaq, sipas Smajljajt, mospajtimet e mundshme në nivelin e kryesisë ose në strukturat e larta të partisë mund të kenë ndikuar që Ramiz Lladrovci të mos lejohet të kandidojë sërish.
“Nuk po them i paarsyeshëm, por ndoshta do të duhej të merren parasysh një numër i faktorëve apo ndoshta PDK-ja ka kalkuluar në atë që ndoshta në Drenas e ka një fitore të sigurtë, pavarësisht se kush mund të jetë kandidati i saj. Mospajtimet e mundshme që mund t’i kenë pasur mes tyre në nivelin e kryesisë ose në nivelin e lartë të organizimit të partisë mund t’i ketë shtyer që në njëfarë mënyre t’i kërkojnë ose mos ta lejojnë që të kandidojë Ramiz Lladrovci”, ka thënë ai në emisionin “Këndi i Debatit” në Tëvë1.
Megjithatë, nëse Lladrovci vendos të kandidojë si i pavarur, Smajljaj beson se ai mund të sfidojë seriozisht PDK-në, duke e vënë në pikëpyetje fitoren e saj në Drenas ose të paktën, duke e bërë të domosdoshëm një balotazh.
“Kjo mund të ndryshojë në rast se Lladrovci vendos të jetë vet kandidat ndoshta mund ta sfidojë në njëfarë mënyre marrë për bazë që duket se ka mbështetje bukur të gjerë në komunën e vet dhe në raste të tilla vërtetë mund ta vë në pikëpyetje që PDK-ja mund të fitojë prapë në Drenas ose të paktën jo pa balotazh”, ka vlerësuar Smajljaj.
