Profesori i sigurisë kibernetike, Blerton Abazi ka deklaruar se Kosova ka një sistem zgjedhor i cili sipas tij është manual dhe të gjitha rezultatet të cilat mblidhen janë prezantuese.
Abazi thotë se përveç problemit të rënies së ueb-faqes së KQZ-së në ditën e zgjedhjeve, problem ka pasur edhe gjatë aplikimit për trust dhe për subvencionimin e teksteve shkollore.
“Ne kemi të bëjmë me dy komponent të ndryshëm të të njëjtit identitetin në njërën anë kemi platformën e publikimit të rezultateve zgjedhore dhe në anën tjetër kemi faqen zyrtare të KQZ-së e cila ka pasur disa probleme që kishte virus. Atë që duhet ta themi dhe ta cekim është që në Kosovë ne kemi një sistem zgjedhor i cili është manual dhe të gjitha rezultatet të cilat mblidhen nga numërimi nga komisionarët, platformat e tjera janë prezantuese. Ky është një problem që po na përcjell në vazhdimësi, ne kemi pasur edhe problemin e njëjtë gjatë aplikimit për dhjetë përqindëshin e trustit, kemi pasur edhe për subvencionimin e teksteve shkollore”, ka deklaruar Abazi në emisionin “Ditari” në tëvë1.
Madje, profesori thotë se ka qenë hera e parë që ka pasur problem ueb-faqja e KQZ-së në zgjedhjet që janë mbajtur deri më tani në Kosovë.
Sipas këtij të fundit, kjo ka ndodhur për arsye të ndërrimit të platformës nga e kaluara në platformë të re, ku sipas tij nuk është testuar.
“Në fakt kësaj radhe ishte hera e parë që kemi pasur një problem të tillë, kjo ka ardhur si rezultat edhe i ndërrimit të platformës nga një platformë e kaluar në një platformë të re dhe me gjasë kjo platforma e re nuk është testuar paraprakisht mbi atë se sa mund të jetë ngarkesa e përdorimit të resurseve dhe më pastaj të zgjerohen. Një mungesë e një testimi të tillë sjell edhe probleme të tilla kur ditën e zgjedhjeve ne nuk shohim rezultatet në kohë reale”, tha ai ndër të tjera./teve1.info/
