Shtetet e Bashkuara të Amerikës kanë shprehur shqetësimin për moscertifikimin e Listës Serbe për pjesëmarrje në zgjedhjet e 9 shkurtit nga Komisioni Qendror i Zgjedhjeve.
Në një përgjigje për teve1.info nga një zëdhënës i ambasadës është thënë vendimet e KQZ-së duhet të kufizohen në zbatimin e standardëve dhe proceseve ligjore.
“Veprimet e KQZ-së rreptësisht duhet të kufizohen në zbatimin e standardeve dhe procedurave ligjore dhe çdo vendim për moskualifikimin e kandidatëve duhet të bazohet vetëm në zbatim të barabartë të ligjit. Procesi zgjedhor duhet të jetë transparent, i besueshëm dhe pa ndërhyrje politike.”, ka thënë ky z zëdhënës i ambasadës.
Poashtu nga ambasada kanë shprehur shqetësimin për siç kanë thënë “përfshirjen e dukshme e kritereve të motivuara politikisht në procesin e certifikimit të kandidatëve në KQZ”
SHBA-ja u ka bërë thirrje partive politike, që kanë probleme me proceset e KQZ-së, të apelojnë në Panelin Zgjedhor për Ankesa e Parashtresa.
“Iu bëjmë thirrje të gjitha palëve që kanë probleme me proceset e KQZ-së që të shfrytëzojë mekanizmat institucionalë në fuqi, përkatësisht Panelin Zgjedhor për Ankesa dhe Parashtresa (PZAP). Të gjithë kandidatët që kualifikohen duhet të lejohen të garojnë në zgjedhje të lira dhe të ndershme në përputhje me ligjin kosovar. Është thelbësore që votuesit e jo organet politike, të vendosin se kush i përfaqëson ata”, thuhet në reagim.
KQZ-ja në mbledhjen e të hënës ka vendosur të mos e certifikojë Listën Serbe.
Shkak për këtë janë vlerësuar thirrjet nacionaliste të kryetarit të Listës Serbe në Kosovë, Zllatan Ellek, të bëra gjatë prezantimit të listës zgjedhore.
