Përballë universiteteve më të njohura të botës, studentët e Fakultetit Juridik shënuan një rezultat të jashtëzakonshëm.
Pesë studentë nga ky fakultet, në garën më prestigjioze të fushës së drejtësisë ndërkombëtare të mbajtur në Nuremberg të Gjermanisë, u renditën në vendin e gjashtë.
Tranerja Nisa Ferati, edhe cila dikur edhe vet ishte pjesëmarrëse e kësaj gare, tregon për garën.
“Gara si garë, mbahet në dy faza është faza me shkrim në të cilën përgatiten memorandumet diku duhet kohë rreth 3 apo 4 muaj me përgatitë. Përgatiten për dy palët për prokurorinë dhe për mbrojtjen dhe në bazë të atyre memorandumeve ne jemi bërë pjese për të shkuar në Gjermani në raunde verbale. Kur kemi shkuar gara ka zgjatë dy ditë intensive, dy ditë janë runde preliminare dhe rundi i trete janë runde eliminuese që është edhe gara për finale”, ka thënë Ferati.
Ferati tregon se edhe para nisjes për në Gjermani, pritshmëritë i kishin të larta.
“Kemi prit se vajzat janë shumë të mira, janë përgatit shumë e në mënyrë intensive kemi qenë ndër ekipet më të mira. Për ne ka qenë si diçka shumë e mirë ndjenje e mirë, jemi ndje shumë krenar. Për ne si jurist ka një peshë shumë të madhe, vajzat më saktësisht: Morea Pula, Rea Hadri, Liza Rexhepi, Enxhi Avdyli dhe Greta Spahiu janë student të Fakulteti Juridikë në Universitetin e Prishtinës. Vajzat janë përzgjedh me përfaqësuar fakultetin në këtë garë prestigjioze. Kanë bërë një punë të palodhshme kanë përfaqësuar Fakultetin Juridik, veten dhe Kosovën në mënyrë më profesion dhe më të dinjitetshme të mundshme”, është shprehur Ferati.
Vet Liza Rexhepi studente pjesëmarrjen në këtë garë thotë se nuk do të harrojë asnjëherë emocionet që ia ka dhënë gara, e konkretisht renditja në vendin e 6-të.
“Kur kuptuam qe jemi renditur te 6-it në botë, ishte moment i papërshkrueshëm. Pas muajve te tërë të përgatitjeve intensive debateve te gjata mbi interpretimet juridike dhe netëve te kaluara duke hulumtuar ai moment ishte një shpërblim i sigurt për punën dhe përkushtimin tonë kolektiv. Na bënte të ndjeheshim krenar që një ekip nga Kosova qëndronte krahë për krahë universiteteve nga e gjithë bota”, ka thënë Rexhepi.
Raundet finale të kësaj gare janë mbajtur në ambientet e Gjykatës së Nurembergut, në vendin ku janë gjykuar nazistët për krimet në Luftën e Dytë Botëre.
Në vitin e kaluar, studentët nga Kosova ishin renditur në vendin e 12-të.
