Kryetari i Partisë Socialdemokrate, Dardan Molliqaj, tha se referendumi në komunat e veriut dështoi, raporton teve1.info
Përmes një reagimi në Facebook, Molliqaj shkroi se bashkë me këtë referendum u vërtetua që sovraniteti i Kosovës në veri është zero.
“Referendumi në komunat e veriut dështoi. Bashkë me të u vërtetua që sovraniteti politik i qeverisë tonë në atë pjesë është zero. Tri vite “dialog” përmes njësive speciale policore, vetëm sa i bashkoi serbët kundër institucioneve të Kosovës. Sot, edhe më shumë se në zgjedhjet e fundit lokale atje, serbët e refuzuan totalisht procesin. Ata dëgjuan Listën Serbe, e jo institucionet tona. Qysh në fillim, instalimi i Kryetarëve shqiptarë pa kurrfarë legjitimiteti, ishte gabim. Dhe gabim vazhdon të jetë edhe mbajtja e tyre me zor në ato pozita që nuk kanë asnjë efekt real përpos që janë instrumente në dorën e populistit Kurti”, ka shkruar Molliqaj.
Sipas tij, ky tension i tri viteve e ka bërë Asociacionin, Superzajednicë.
“Taktikat e Kurtit na kanë sjellë marrëveshje katastrofale. Në veri kemi kryetar me 200 vota, e në Kosovë kemi sanksione, izolim dhe stagnim. Kësaj marrëzie duhet t’i japim fund”, ka thënë Molliqaj.