Kryetari i Partisë Socialdemokrate, Dardan Molliqaj, ka reaguar pas arrestimit të aktivistes së kësaj partie Sonila Pllashniku nga Policia e Kosovës, raporton teve1.info
Përmes një shkrimi në Facebook, Molliqaj ka thënë se bilanci i vitit është negativ për babadimrin kryeministër, andaj sipas tij Kurti nuk e duron fjalën e lirë, nuk e duron protestën dhe siç ka thënë, fletushkat që e shpalosin të vërtetën.
“Shumë dhurata për partinë, e shumë dëme për Kosovën. Po realizohet Zajednica; po dënohet UÇK-ja; po keqarsimohet rinia. Nuk ka kohë për shfaqjet festive të kryeministrit!
Kjo qeveri që e kapi Universitetin, ia uli buxhetin universiteteve publike, zvogëloi pagat e profesorëve, favorizoi arsimin privat, nuk është e mirëpritur në hapësirat universitare!
Prandaj sot aktivistja e PSD-së Sonila Pllashniku ia ndërpreu fjalën Kryeministrit duke fishkëlluar në shenjë proteste dhe duke shpërndarë një fletushkë ku i listuam pikërisht dëmet e mësipërme që Kryeministri ia solli Kosovës këtë vit.
Në mënyrë të padrejtë, të papranueshme dhe tërësisht jodemokratike, Policia e Kosovës arrestoi Sonilën. Babadimri siç duket nuk e duron fjalën e lirë; nuk e duron protestën; nuk i duron fletushkat që shpalosin të vërtetën për të!”, ka shkruar Molliqaj.
