Real Madridi arriti një fitore 3-2 ndaj Leganes, duke siguruar kalimin në gjysmëfinale të Kupës së Mbretit me një gol në kohën shtesë dhe ndeshja u shënua edhe nga një lloj përplasjeje mes Luka Modric dhe Vinicius Junior.
Pesë minuta para përfundimit të lojës, Modric rreshtoi Viniciusin dhe e qortoi para të gjithëve, sepse ai nuk vazhdoi me kundërsulmin e vendasve, por përkundrazi ecte nëpër fushë.
Futbollisti kroat më herët kishte tentuar t’i vinte në dukje dy herë Viniciusit se duhej të ndihmonte shokët e skuadrës, por ky i fundit e injoroi. Më pas Modric reagoi ashpër dhe filloi të bërtasë: “Pse nuk po kthehesh? Pse nuk po ndihmoni mbrojtjen?”.
Më pas Vinicius e pyeti se çfarë donte prej tij, për të cilën Modric i tha të shkonte në ferr.
Braziliani u zemërua aq shumë sa në fund të ndeshjes nuk donte të festonte me shokët e skuadrës por menjëherë vrapoi në dhomat e zhveshjes dhe këtë situatë e komentoi edhe Marca.
“Demostrimi i hierarkisë ishte spektakolar. Pak lojtarë në dhomën e zhveshjes mund të kishin reaguar kaq ashpër ndaj Vinicius, të cilit nuk i pëlqeu aspak dënimi publik. Ai nuk u gëzua shumë pas golit fitues të Garcias dhe nuk qëndroi për të festuar fitoren me shokët e tij, por përkundrazi vrapoi direkt në dhomën e zhveshjes”, shkroi Marca.
Incidentin e ka komentuar edhe Carlo Ancelotti, duke mbështetur Modric.
“Çfarëdo që të ndodhë, unë i besoj Modric. Unë jam gjithmonë në anën e Modric, dhe kështu është edhe këtë herë”, deklaroi Ancelottin.
Mirëpo, Modric u qetësua pas ndeshjes, duke thënë se këto janë gjëra që ndodhin në fushë.
