Ministria e Kulturës, Rinisë dhe Sportit ka thënë se i konsideron të pabazuara dhe manipulative pretendimet e kryetarit Përparim Rama, që qeverisja qendrore po i bllokon dhe ndalon projektet kapitale të Komunës së Prishtinës.
Sipas MKRS-së komuna po tenton të paraqesë zbatimin e ligjit si pengesë politike.
“Në fakt, është vet ajo që ka vepruar dhe po vazhdon të veprojë në kundërshtim me ligjin për trashëgiminë kulturore e ligjet tjera dhe po e dëmton buxhetin e shtetit, e cenon interesin publik. Ministria e Kulturës, në vazhdimësi është sfiduar me veprimet e njëanshme të Komunës së Prishtinës, përkatësisht për projektin e sheshit “Xhorxh Bush”, atë të “Ishullit Urban”, Rrugës “Rexhep Luci” dhe projektin te Rruga “Agim Ramadani”, thuhet në sqarim.
Ndërsa ngritjen e kallëzimit penal ndaj inspektorit të Inspektoratit të Trashëgimisë Kulturore, Pajtim Zogaj e kanë parë si formë të presionit ndaj zyrtarëve që zbatojnë ligjin, të pabazuar dhe tendencioz.
Ky veprim thuhet se vjen pasi MKRS, me datën 2 prill 2025, ka dorëzuar kërkesën për fillim të hetimeve për fenomenin e ndërhyrjeve pa leje në zona të mbrojtura të trashëgimisë kulturore nga ana e Komunës së Prishtinës, ku siç theksohet i kanë argumentuar shkeljet e rënda që janë bërë në këto projekte.
Më tej bëhet e ditur se kallëzimit penal ndaj zyrtarit të Inspektoratit të Trashëgimisë Kulturore, do t’i përgjigjen me kallëzim penal për kallëzim të rrejshëm, si dhe që dorëheqjen e drejtorit të ITK-së, Imer Hakaj nuk e miratojnë pasi siç thuhet e gjithë puna e bërë deri tani është brenda mandatit të tij.
“Inspektorati ka vepruar në përputhje të plotë me legjislacionin në fuqi dhe brenda autorizimeve ligjore. Ne, konsiderojmë që veprimet e përsëritura, të qëllimshme dhe me paramendim të Komunës së Prishtinës, nuk paraqesin vetëm shkelje procedurale, por kemi dyshime të bazuara për keqpërdorim dhe dëmtim të buxhetit publik”, thuhet në reagim.
MKRS, poashtu ka përmendur se në muajin dhjetor 2024, ka ngritur kallëzim penal ndaj kryetarit të Prishtinës për keqpërdorim të pozitës apo autoritetit zyrtar, pasi i njëjti ka lidhur kontratë mbi 6.5 milionë euro, pa leje sipas ligjit për trashëgimi, ka kryer afër 1.5 milionë euro pagesa të paligjshme, dhe ka kontraktuar punë në pronën e dhënë në shfrytëzim afatgjatë për ndërtimin e TOB.
Ndryshe, Drejtori i Inspektoratit për Trashëgimi Kulturore në kuadër të Ministrisë së Kulturës, Rinisë dhe Sportit, Imer Hakaj, të martën ka njoftuar se ka dhënë dorëheqjen nga posti i tij.
Ky veprim i tij ka ardhur pas njoftimit për inicimin e kallëzimit penal nga Komuna e Prishtinës ndaj Inspektoratit.
“Nga sot, beteja do të vazhdojë për drejtësi ndaj të gjithë shkelësve të Ligjit për Trashëgimi Kulturore”, ka shkruar Hakaj, duke shtuar se e mban përgjegjësinë e plotë për veprimet dhe mosveprimet institucionale gjatë mandatit të tij.
