Ministria e Kulturës, Rinisë dhe Sportit, ka njoftuar se në bashkëpunim me Bankën Evropiane për Investime (EIB Global) dhe Ndërmarrjen Lokale Publike “Pallati i Rinisë” si partnere e MKRS, ka nënshkruar marrëveshje bashkëpunimi për sigurimin e një granti teknik në vlerë prej 500 mijë euro.
Sipas MKRS-së qëllimi i marrëveshjes është ofrimi i asistencës teknike për përgatitjen e projektit të rikonstruktimit, konservimit, restaurimit dhe modernizimit të Pallatit të Rinisë dhe Sporteve në Prishtinë.
“Mbështetja do të përfshijë vlerësime teknike, mjedisore, financiare dhe energjetike, si dhe hartimin e dizajneve paraprake për tërë kompleksin e ndërtesës, në përputhje me standardet më të larta ndërkombëtare dhe konventat për mbrojtjen e trashëgimisë kulturore. Kjo marrëveshje përfaqëson një hap të rëndësishëm drejt sigurimit të një kredie potenciale nga EIB për realizimin e projektit të plotë të revitalizimit”, thuhet në njoftim.
Më tej thuhet se synimi është që Pallati i Rinisë të shndërrohet në një qendër moderne, multifunksionale, dhe të qëndrueshme, duke ruajtur njëkohësisht vlerat historike e arkitektonike që e bëjnë këtë aset një simbol të Prishtinës.
“Ky projekt është i një rëndësie strategjike për infrastrukturën kulturore dhe sportive të vendit, dhe do të luajë rol kyç në organizimin e Lojërave Mesdhetare “Prishtina 2030”, të cilat Republika e Kosovës do t’i presë për herë të parë. Ministria e Kulturës mbetet e përkushtuar për investime të qëndrueshme dhe të mirëplanifikuara në infrastrukturën publike që i shërben të rinjve, komunitetit artistik dhe sportiv, si dhe trashëgimisë sonë kulturore”, theksohet në njoftim.
