Për shkak të mos përmbushjes së obligimeve ligjore dhe në proces të harmonizimit për mbështetje financiare nga shteti, Federata e Futbollit e Kosovës, por edhe federata të tjera sportive kanë mbëtur pa përfituar nga memorandumet e mbështetjes financiare për vitin 2025, nga Ministria për Kulturë, Rini e Sport.
Në një postim në facebook, të zëvendës ministres së MKRS-së, Daulina Osmani, bëhet e ditur që përfituese janë vetëm gjashtë federata, Komiteti Olimpik dhe Paralimpik i Kosovës.
Osmani ka ftuar federatat që të harmonizojnë statutet konform Ligjit të ri për sport.
Postimi i Daulina Osmanit në Facebook:
Gjatë kësaj jave kemi nënshkruar memorandumet e mbështetjes financiare për vitin 2025, me vlerë totale prej afër 8 milionë euro për federatat sportive dhe parasportive, Komitetin Olimpik dhe Paralimpik të Kosovës dhe Olimpiadën Speciale.
Shpërndarja e këtij buxheti, por edhe përfitimet shtesë nga ligji i sponsorizimit, do të mund të bëhen vetëm pas harmonizimit të dokumentacionit të organizatave me legjislacionin e ri. Kjo kërkesë është komunikuar që nga shtatori i vitit të kaluar.
Deri më tani, janë 6 federata që kanë përmbushur këtë obligim: basketbolli, karate, noti, triathloni, hendbolli dhe pingpongu.
Federatat e tjera janë në proces të harmonizimit dhe pritet t’i përmbushin obligimet e tyre ligjore në mënyrë që të mund të përfitojnë mbështetjen financiare.
