Ministria e Kulturës Rinisë dhe Sportit pasditën e së hënës ka komunikuar për licencimin e gjashtë federatave të tjera, por edhe njëherë mungon Federata e Futbollit te Kosovës.
Në njoftimin e hedhur në rrjete sociale, bëhet me dije se pas rekomandimit pozitiv të Komisionit për licencim në kuadër të Ministrisë së Sportit, i janë dorëzuar zyrtarisht licencat për ushtrimin e veprimtarisë Federatës Skitare, Federatës së Tenisit, Federatës së Boksit, Federatës së Shenjëtarisë, Federatës së Autosportit dhe Federatës Muaythai.
Por një prej federatave të palicencuara që ka mbetur është ajo e futbollit. FFK-ja ka aplikuar për licencim, por nuk e ka marrë ende. FFK-ja dhe klubet e saj kanë bërë më së shumti kërkesa për sponsorizime. Vlerësohet të jetë rreth 1 milion euro në vit. Në fakt, sponsorizimet janë bërë edhe burim kryesor i klubeve të futbollit e po ashtu edhe të sporteve tjera. Pas kësaj që po ndodh rrezikon që asnjë klub i këtyre federatës së futbollit nuk do të marrë vërtetim për sponsorizime, të rekomanduar nga Komisioni Vlerësues për Licencim të Federatave Sportive të Kosovës, Komisionit për Shqyrtimin dhe Vlerësimin e Kërkesave për Lëshimin e Vërtetimeve për Sponsorizim në Fushën e Kuturës, Rinisë dhe Sportit, konkretisht në fushën e sportit.
