Zëdhënësja e KRU “Prishtina”, Arjeta Mjeku, vlerësoi që brenda kësaj jave pritet të stabilizohet gjendja e nivelit të manganit në Liqenin e Badocit.
Ajo ka thënë se situata është duke u monitoruara dhe se ka rënie të nivelit të manganit në ujë.
“Situata ka filluar të stabilizohet, deri në njoftimin e radhës dhe jemi në monitorim të vazhdueshëm më Institutin e Shëndetit Publik të Kosovës. Kemi përcjellur vazhdimisht nivelin e manganit në Liqenin e Badocit, por kohëve të fundit kemi hasur që ka rënie të nivelit të dhe shumë shpejtë pritet të përmirësohet gjendja. Kjo është dukuri natyrore, nuk e kemi ditur kur do të fillojë dhe nuk e dimë kur do të mbarojë”, potencoi Mjeku në emisionin “Ditari” në Tëvë1.
Po ashtu, Mjeku vlerësoi që reshjet atmosferike mund të ndikojnë sado pak në zbutjen e nivelit të manganit.
“Për ata konsumatorë që kanë gjendje të rëndë ekonomike, ne vazhdimisht jemi duke dërguar autobotë për furnizim me ujë dhe për gatim. Po shpresojmë që situata të stabilizohet brenda kësaj jave, sepse edhe reshjet atmosferike janë një faktor që mund ta zbusin sado pak nivelin e manganit në Badoc”, shtoi tutje Mjeku në Tëvë1.
Kompania rajonale e Ujësjellësit “Prishtina”, me rekomandim të Institutit Kombëtar të Shëndetit Publik, sot ka bërë shpëlarjen e linjave magjistrale dhe sekondare në zonat që furnizohen nga ITU Badoc.
