Ditë më parë është raportuar në media se nënkryetarja e Lidhjes Demokratike të Kosovës, Shqipe Mjekiqi Sadiku ka dhënë dorëheqje nga kjo pozitë.
Kurse sot Mjekiqi Sadiku përmes një postimi në llogarinë e saj në Facebook ka thënë se të martën edhe zyrtarisht ka dhënë dorëheqje nga pozita e nënkryetares së LDK-së.
Kjo sepse sipas saj, nuk ka pasur hapësirë të mjaftueshme për të kontribuar dhe se siç tha ajo, kompetencat ishin të kufizuara me pozicionin që ajo kishte në parti.
“Të martën, më 14 mars 2023, kam dhënë dorëheqje nga pozita e nënkryetares dhe anëtares së Kryesisë së Lidhjes Demokratike të Kosovës. Mundësinë për të shërbyer në strukturat e larta e morra si besim dhe konfirmim për vullnetin e mirë drejt ndryshimeve thelbësore. Fatkeqësisht, hapsira për të kontribuar ishte e pamjaftueshme ndërkaq, përgjegjësitë dhe kompetencat ishin të kufizuara në raport me pozicionin që kisha. Për më tepër, përpjekjet për të ndryshuar këtë nuk patën sukses”, ka thënë ajo.
Ajo ka falënderuar strukturat e LDK-së për mbështetjen, teksa ka theksuar se do të mbetet në themelet e LDK-së.
“Vazhdoj të mbetem me gjithë qenien time në themelet e Lidhjes Demokratike të Kosovës.Falënderoj nënkryetarët tjerë, anëtarët e Kryesisë si dhe gjithë strukturat e Lidhjes Demokratike të Kosovës për mbështetjen. Poashtu, falënderoj familjen time dhe miqtë e shumtë pa përkrahjen e të cilëve ky rrugëtim, sado i shkurtër, do të ishte i pamundshëm”, tha ajo./teve1.info./
https://teve1.info/lajmet/shqipe-mjekiqi-jep-doreheqje-nga-pozita-e-nenkryetares-ne-ldk/
