Shemsi Berisha, frekuenton parkun e kryeqytetit tash e sa vite.
E në këtë kohë të ngrohtë freskinë e gjenë nën pisha, por të njëjtin e brengos mungesa e hapësirave tjera gjelbëruese.
“Ka deri diku por jo sa me thënë të mjaftueshme, Prishtina nuk ka shumë vende e ka Parkun e Gërmisë e ka këtu këtë park të vogël. Hije gjithë patjetër se diellin nuk ma do hiç, hijet e kam për shpirt hijet shumë i dua”, thotë Berisha.
Hijet, i ndjek edhe Mehmet Pllana gjatë stinës së verës. Mirëpo ai shprehet optimist se do e kaloj pa probleme vapën e madhe që ka kapluar vendin.
“Unë jetoj në fshat e me tepër po e shfrytëzoj kohën kur është pa diell me punu diçka. Më mundojnë edhe mu për shkak se deri më tani ka qenë një kohë kogja e ftohtë është një ndryshim i madh i temperaturës të dikush ndikon më shumë e te dikush më pak, por besoj që i përballojmë”, shprehet ai.
Deri më tani po duket se edhe qytetarët po i përballojnë mirë këtyre temperaturave.
Kështu të paktën thonë edhe nga Qendra Kryesore e Mjekësisë Familjare në Prishtinë, duke apeluar qytetarët që te kenë kujdes të shtuar gjatë këtyre ditëve.
“Ndoshta është fillimi i sezonës nuk është që kemi shumë raste nga temperaturat e larta. Mirëpo ne çdo herë i këshillojmë pacientet që me i evituar daljet kur janë temperaturat e larta edhe vetëm kur është e domosdoshme. Por, edhe kur duhet me dal patjetër në atë periudhë duhet të vishen me rroba me ngjyrë të hapura dhe të pambukta. Njëkohësisht duhet të konsumojnë më shumë lëngje pemë të freskëta e perime e të i evitojnë daljet e panevojshme në temperaturat e larta”, thotë Albana Morina –specialit i mjekësisë familjare.
Morina, tregoi se edhe cilët janë personat më të ndjeshëm ndaj të nxehtit.
“Janë personat e moshuar atë që janë me sëmundje kronike gratë shtatzëna mirëpo temperaturat i atakojnë të gjitha moshat por këto janë grupet që kanë rrezik e që duhet të kenë kujdes që ti evitojnë daljet në këtë periudhë”, ka thënë ajo.
Temperatura më e lartë deri më tani është shënuar në qytetin e Hanit të Elezit.
