Gjykata Themelore në Mitrovicë ka refuzuar kërkesën e Prokurorisë për caktimin e masës së arrestit shtëpiak ndaj katër zyrtarëve policorë të dyshuar për veprën penale “manipulim me prova”.
Në njoftimin e gjykatës thuhet se masa e kërkuar nga Prokuroria është e pabazuar dhe se lënia në liri e të dyshuarve nuk do ta pengojë procesin penal.
“Gjyqtarja e procedurës paraprake, pas shqyrtimit të kërkesës së Prokurorisë për caktimin e masës së arrestit shtëpiak, kundërshtimeve dhe argumenteve të paraqitura nga të pandehurit dhe mbrojtësit e tyre, si dhe analizimit të të gjitha shkresave të lëndës, ka vlerësuar se nuk ka nevojë për caktimin e ndonjë mase. Me lënien në liri të të pandehurve, do të arrihet qëllimi i sigurimit të pranisë së tyre në procedurë, dhe kjo nuk do të ndikojë në pengimin apo vonimin e zhvillimit të suksesshëm të çështjes penale”, ka bërë të ditur Themelorja.
Gjykata ka theksuar se “nuk duhet zbatuar një masë më e rëndë kur është e mjaftueshme një masë më e butë për sigurimin e pjesëmarrjes së tyre në procedurë”.
Katër policët, të identifikuar me inicialet Q.K., B.M., L.T. dhe F.A., u arrestuan më 16 shtator nga Inspektorati Policor i Kosovës (IPK). Ata dyshohen se më 13 shtator nuk kanë proceduar me një rast penal të “Shkaktimit të rrezikut të përgjithshëm” dhe se kanë manipuluar me provat e gjetura në vendin e ngjarjes.
“Si pjesë e procedurave administrative IPK i ka rekomanduar Policisë së Kosovës – Drejtorisë Rajonale të Policisë Mitrovicë Jug edhe suspendimin për katër të dyshuarit të cilët kanë qenë me detyrë në Stacionin Policor në Mitrovicën e Jugut. Hetuesit e IPK-së në koordinim të plotë me Prokurorinë do të vazhdojnë të ndërmarrin edhe veprime të tjera hetimore drejt ndriçimit të plotë të të gjitha rrethanave që ndërlidhen me këtë rast”, ka njoftuar IPK-ja.
