Avokati mbrojtës i ish-presidentit të Kosovës, Hashim Thaçi, Luka Mishetiq, e ka nisur fjalën e tij përmbyllëse duke theksuar se gjykimi duhet të bazohet në parimin themelor të prezumimit të pafajësisë.
Ai u ka thënë trupit gjykues se pika e nisjes në shqyrtimin e çështjes duhet të jetë pafajësia e Thaçit, ndërsa barra e provës i takon Prokurorisë.
“Kur t’i filloni kuvendimet tuaja, ju do të filloni nga qëndrimi se Hashim Thaçi është i pafajshëm dhe më pas ju do të vlerësoni nëse provat e paraqitura nga Zyra e Prokurorit të Specializuar ju kanë bindur juve, jashtë dyshimit të arsyeshëm, se Hashim Thaçi është fajtor”, ka deklaruar Mishetiq para gjyqtarëve.
Sipas tij, mbrojtjes i nevojiten katër orë për paraqitjen e plotë të argumenteve në fjalën përmbyllëse.
Gjatë paraqitjes, Mishetiq ka rikujtuar edhe dëshmitë e disa dëshmitarëve ndërkombëtarë, të cilët kanë dëshmuar në favor të Thaçit. Ai theksoi se, sipas tyre, në kohën kur po ndodhnin ngjarjet për të cilat akuzohet Thaçi, ai nuk ishte subjekt i dyshimeve për krime lufte.
“Ju keni dëgjuar nga dëshmitarët ndërkombëtarë që kanë thënë se Hashim Thaçi nuk dyshohej për krime lufte, ndërkohë që këto ngjarje po ndodhnin dhe po zhvilloheshin. Dëshmitarët ndërkombëtarë ju thanë se për këto ngjarje ishin të informuar përmes burimeve diplomatike, shërbimeve të inteligjencës dhe të tjera, si dhe përmes përvojave të tyre personale, përfshirë përvojat e tyre me Hashim Thaçin”, ka shtuar ai.
Në mesin e figurave ndërkombëtare që kanë dëshmuar në mbrojtje të Thaçit janë ish-komandanti suprem i forcave aleate të NATO-s, Wesley Clark, ish-ndihmësi i sekretarit amerikan të Shtetit, James Rubin, si dhe diplomati i pensionuar amerikan, Christopher Hill.
