Prej disa vitesh tashmë, avokati Luka Misetiq është angazhuar në një proces të rëndësishëm gjyqësor.
Ai mbron ish-Presidentin Hashim Thaçi, nga akuzat që ia ka vënë barrë Zyra e Prokurorit të Specializuar në Hagë.
E pas gati pesë vitesh proces gjyqësor, Misetiqit i është forcuar bindja që e kishte në fillim, se Thaçi është tërësisht i pafajshëm.
“Në përgjithësi, mendoj se ky rast dhe provat kundër zotëri Thaçit kanë qenë shumë të dobëta. Nuk mund të flas për provat tani, por mendoj se në fund të gjykimit do të shihni se pretendimet që nisën me raportin e (senatorit zviceran Dick) Marty nuk kanë thuajse asnjë lidhje me provat e paraqitura kundër z. Thaçit në këtë gjykim për mbi dy vjet. Në këtë kuptim jam shumë optimist për rezultatin që del nga ky rast, për z. Thaçi, mendoj se provat kanë qenë shumë të dobëta dhe patjetër se do t’i argumentojmë këto para Trupit Gjykues në kohën e duhur”, shprehet Misetiq.
Gjatë gjithë procesit, Misetiq thotë se ia parashtroi shpesh vetes një pyetje.
“Siç dihet nuk mund të jap komente rreth asaj që është thënë në seanca private, nuk mund ta komentoj, por mund të ju them se nëse flas në përgjithësi, për mendimin tonë provat kundër z. Thaçi janë jashtëzakonisht të dobëta deri në atë pikë që gjatë procesit e kam pyetur veten “pse është akuzuar z. Thaçi?”, thotë ai.
Misetiq thekson se Prokuroria ka dështuar që të paraqesë fakte të mjaftueshme për pjesë të caktuara të aktakuzës.
Të premten bëhen dy vite prej kur nisi gjykimi në këtë rast.
Misetiq është i zhgënjyer që ish-krerët e UÇK-së po mbahen në paraburgim prej gati pesë vitesh, dhe për faktin se Prokurorisë i është nevojitur kaq shumë kohë që ta përfundoj çështjen e saj.
