Biletën që pagoi për ardhjen e saj nga Gjilani në Prishtinë e ruajti.
Kjo pasi, e njëjta i duhet edhe për transportin urban në kryeqytet.
Vendimi për inkorporimin e biletës ndërurbane në atë gjithëditore u mundëson udhëtarëve që vinë nga komunat tjera të përdorin transportin publik pa pagesë.
Ky vendim u prit mirë nga qytetarët, sidomos nga llapjanët.
“Kjo ka qenë e mirë sepse së pari është rregullu gjendja e transportit shumë më rregull se që e kemi pas dhe ti kanë dhënë disa mundësi për më lirë”, shprehet Njazi Shala.
“Kjo d.m.th është një punë shumë e madhe dhe e mrekullueshme dmth e përshëndes përzemërsisht dhe i uroj suksese e poget që është kryetari më i mirë deri tani që ka pas Prishtina”, thotw qytetari Liridon Raçi.
Vendimin e përshëndeti edhe një qytetar nga Komuna e Prishtinës.
“Vendim më të mirë Komuna e Prishtinës kurrë ska marrë për qytetarët ndoshta është pak pengesë për bizneset por për qytetarët, por edhe bizneset duhet me ju përshtat pak qytetarëve se nuk munden të jetojnë pa qytetarë ata” u shpreh Beqir Lahu.
Ky vendim ka hyrë në fuqi që nga data 17 mars.
“Kësisoj për të zgjedhur edhe këtë ngërç por edhe për ta përmbyllë atë reformën e transportit urban, kemi vendosur që të bëjmë falas pra biletën për qytetarët e Kosovës që vijnë nga qytetet e tjera, zbarkojnë në stacionin e autobusëve dhe me biletën që e prezantojnë tek linja e transportit urban që qëndron aty mund të vazhdojnë për në qytet ku i kanë punët e tyre”, tha Donat Lushaku, zëdhënës në Komunën e Prishtinës.
Por nga disa vende të Kosovës, linjat e autobusëve nuk lëshojnë kupona fiskalë. Andaj komuna thotë që doemos edhe ata duhet të nisin lëshimin e këtyre kuponëve.
“Me këtë vendim ne imponojmë që për të përdorur qytetarët linjat urbane falas duhet të prezantojnë këtë biletë, pastaj linjat e ndryshme të Pejës Vushtrrisë Mitrovicës duhet ta lëshojnë atë kupon fiskal dhe kësisoj nuk kemi një lloj informaliteti”, tha Lushaku.
Sipas të parit të komunës, Përparim Rama, ky vendim është marrë me qëllim që brenda Prishtinës të ketë më pak vetura dhe trafik e më shumë organizim dhe siguri.
