Në mbledhjen e sotme të Qeverisë është miratuar Projektligji për Inspektoratin e Arsimit.
Ky Projektligj përcakton statusin e Inspektoratit të Arsimit në Republikën e Kosovës, kushtet dhe mënyrën e organizimit dhe funksionimit të tij, strukturat përgjegjëse, kompetencat dhe përgjegjësitë.
“Si i tillë paraqet legjislacion thelbësor për funksionimin e Inspektoratit të Arsimit, sipas standardeve më të larta të kohës dhe njëkohësisht, do të ndikojë në fuqizimin e rolit të Inspektoratit, në funksion të ushtrimit të detyrave dhe përgjegjësive, e në veçanti në ngritjen dhe përmirësimin e cilësisë në arsim”, thuhet në njoftimin e MAShT-it.
Sipas njoftimit, në procesin e hartimit të këtij projektligji janë përfshirë zyrtarë nga MASHTI dhe institucioneve vartëse të Ministrisë, përfaqësues nga Fakulteti i Edukimit, zyrtarë komunal të arsimit, ekspertë vendorë, përfshirë këtu edhe ekspertë të angazhuar nga GIZ gjerman dhe nga projekti i Bashkimit Evropian KosEd.
Ndryshe, Ministria ka paraparë disa ndryshime në këtë projektligj të cilat janë; Fushëveprimi i inspektoratit, përcaktimin i statusit ligjor dhe strukturat përgjegjëse, organizimi dhe funksionimi i inspektoratit të arsimit ,detyrat dhe përgjegjësitë e inspektorëve dhe kryeinspektorit, detyrat dhe përgjegjësitë e inspektorit pedagogjik, mënyra e ankimimit, si dhe rregullimi i procesit të kundërvajtjeve dhe shkeljeve disiplinore, në përputhje me legjislacionin në fuqi./teve1.info/
