Në mbledhjen e sotme të Qeverisë, është miratuar Projektligji për Shërbime Sociale dhe Familjare në Kosovë.
Në fjalën e saj, ministrja Haxhiu tha se Shërbimet Sociale dhe familjare në Kosovë janë organizuar në bazë të një ligji i cili është miratuar në vitin 2007, ndërsa plotësim ndryshimi i tij për herë të fundit ka ndodhë në vitin 2012.
“Do të thotë diku plotë afërsisht 14 vite, Kosova funksionon me një legjislacion të shërbime sociale dhe familjare me plotë mangësi e boshllëqe ligjore, përderisa kërkesa dhe nevoja e qytetarëve për shërbime të reja është rrit në vazhdimësi”, tha Haxhiu, thuhet në komunikatën e Ministrisë së Drejtësisë.
Në këtë ekspoze ministrja Haxhiu paraqiti disa nga risitë e këtij Projektligji si politika të reja në shërbime sociale dhe familjare dhe të cilat përbëjnë reformën rrënjësore në këtë fushë.
Koncepti i strehimit familjar dhe fuqizimi i familjes strehues për fëmijët pa përkujdesje prindërore, si njëra ndër format më të mira të mbrojtjes së fëmijëve, duke përfshire strehimin, mirëqenien, edukimin dhe shkollimin e tyre, zë vend të rëndësishëm si politikë e re në ketë Projektligj.
Ky Projektligj gjithashtu si politikë të re e ka rregullimin e jetesës së pavarur të mbikëqyrur e cila është një formë e re e kujdesit social për të rinjtë +18 të cilët për deri sa kanë qenë fëmijë, pra nën moshën 18 vjeçare, kanë qenë nën kujdesin e njërës nga format e mbrojtjes sociale. Kjo formë e mbrojtjes përmes këshillimit dhe mbështetjes sociale është e nevojshme për të gjithë këta të rinjë, sidomos për të rinjtë +18 me nevoja të veçanta.
Projektligji adreson edhe partneritetin publiko-privat në ofrimin e shërbimeve sociale dhe familjare dhe kontraktimin e shërbimeve, meqenëse njëra ndër problemet thelbësorë aktuale e shërbimeve sociale dhe familjare është financimi i qëndrueshëm i tyre, me theks të veçantë financimi i qëndrueshëm i strehimoreve dhe qendrave të kujdesit ditor, të cilat ofrojnë shërbime për viktimat e dhunës në familje, dhunës në baza gjinore, fëmijët pa kujdes prindëror, fëmijë të keqtrajtuar, të abuzuar, të braktisur, fëmijë me nevoja të veçanta, fëmijë e të rinj viktima të përdorimit të substancave psiko – aktive dhe kategoritë e tjera në nevojë sociale.
Inspektimi i shërbimeve sociale dhe familjare në ligjin aktual në fuqi, me tepër ka rol këshillues dhe rekomandues, gjë e cila kemi menduar që duhet të ndryshojë duke e fuqizuar divizionin e inspektimit me kompetenca shtesë, theksoi ministrja Haxhiu.
Si rrjedhojë, në këtë Projektligji inspektoratit të shërbime sociale dhe familjare përveç mbikëqyrjes dhe inspektimit i shtohet kompetenca e shqiptimit të masave adekuate ligjore për subjektet dhe ofruesit individual të licencuar në fushën e shërbimeve sociale dhe familjare, të cilët eventualisht nuk i ofrojnë shërbimet në përputhje me kushtet dhe standardet ligjore.
Natyrisht menjëherë pas miratimit të këtij projekt ligji dhe hyrjes së tij në fuqi, organet relevante do të angazhohen në hartimin e akteve nënligjore që derivojnë nga ky projektligj në mënyrë që shërbimet sociale dhe familjare të jenë të qasshme, efikase dhe në shërbim të të gjithë qytetarëve, në veçanti në shërbim të atyre që konsiderohet se janë në nevojë sociale./Teve1.info/
