Me 61 vota për, asnjë kundër dhe asnjë abstenim është votuar shqyrtimi i dytë i projektligjit për ndarje buxhetore për buxhetin e Kosovës për vitin 2025. Në votim nuk morën pjesë opozita, të cilët patën kritika për mostransparencë.
Pas një diskutimi rreth 5 orësh, kuorumi u arrit.
Kështu të enjten partia në pushtet Lëvizja Vetëvendosje, me 61 vota për, asnjë kundër dhe asnjë abstenim, votoi ndarjen buxhetore në lexim të dytë për vitin 2025 i cili kap shifrën 3.6 miliard euro.
Por këtë nuk e përkrahën partitë opozitare, të cilat paraprakisht kritikuan Qeverinë.
“Nuk ju vjen marre që para katër vitesh ju keni marrë votën tu i mashtrua. Kjo ka me qenë pamja më e turpshme e këtij kuvendi që sot një deputet nuk ka guxim me dal me thanë: jo Fitore, jo Fitore se sbon, nuk boni buxhet që i dëmton interesat e qytetarëve të Kosovës me u votua në këtë Kuvend” , ka thënë deputetja e PDK-së, Blerta Deliu-Kodra.
“Keni parasysh jeni duke e ndërtuar një precedentë të rrezikshëm. Duke marrë parasysh që ligji për buxhetin është ligj jashtëzakonisht i rëndësishëm për financat e shtetit, ne si grup parlamentar nuk do ta dërgojmë në Gjykatën Kushtetuese, por i bëjmë thirrje presidentes së Republikës së Kosovës që të jetë në detyrën e vet Kushtetuese dhe të garantoj që ligji të kthehet në Kuvend dhe t’i plotësojë kriteret e duhura” , ka thënë Shefi i Grupit Parlamentar të LDK-së, Arben Gashi.
“Ky është buxheti i 6, që e sjell në Kuvend kryeministri Albin Kurti, dhe është buxheti i 6 që askush asnjë deputet i vetëm, nuk mund ta vendos një amendament një presje dhe një program i cili do të reflektonte” , ka thënë shefi i Grupit Parlamentar të AAK-së, Besnik Tahiri.
E mazhoranca nuk i përkrahi amandamentet e PDK-së.
Debati u acarua mes deputetit të pavarur, Haki Abazi dhe Gani Krasniqit nga LVV.
“ Me sabotua gjithkon që është kundër juve, nuk është në rregull kjo punë. Qytetari duhet me kuptu nuk mundemi me ju dhënë buxhet për me vazhdu ju me financu makinerinë propagandistike, fashiste të fejsbukut kundër deputetëve” , ka thënë deputeti i pavarur, Haki Abazi.
“Nuk jom këtu unë edhe asnjëri tjetri për të na mbajtur moral se kush është Haki Abazi, i cili doli foli për fashizmin, e për gjitha tjerat. Lutem secili që del të fol për vete, ja garanton Kushtetuta, e jo këtu të thirret me emër e mbiemër, aq më pak Haki Abazi që ja njoh edhe plancin e tij”, ka thënë deputeti i LVV-së, Gani Krasniqi.
“Fol këtu qartazi për çka e ki fjalën, fol me fakte, secilin fakt. Absolutisht se ti çfarë po thu po konfirmon fushatën fashiste të kontrabandës dhe lajmeve të rrejshme që keni lëshua nga Lëvizja Vetëvendosje”, ka thënë Abazi.
Në votimin e buxhetit për vitin 2025, partitë opozitare PDK, LDK dhe AAK lëshuan paraprakisht sallën dhe nuk morën pjesë në votim.
