Radha e dëshmitarëve në rastin e katërshes së UÇK-së, pësoi sërish ndryshime.
Prokuroria kishte kërkuar që dhjetë dëshmitarë të saj, të mos dëshmojnë në gjykatore, por të pranohen si prova dëshmitë e tyre në procedura të mëhershme.
Një gjë e tillë, u aprovua nga trupi gjykues.
“Trupi Gjykues miratoi pjesërisht një kërkesë të Prokurorisë për të pranuar dëshmitë e 10 dëshmitarëve sipas rregullës 153. Kjo rregull lejon që dëshmia të pranohet me shkrim pa pasur nevojë që dëshmitari të paraqitet në sallë të gjyqit, në qoftë se dëshmia e dëshmitarit nuk lidhet konkretisht me veprimet dhe sjelljen kriminale të të akuzuarve”.
Dëshmitarët e tillë, varësisht nevojës vlerësohet se mbrojtja mund t’i thërras vet.
“Prokuroria ka të drejtë që t’i ftojë dëshmitarët që dëshmia e tyre të merret në gjykatore ose të propozon që disa deklarata të dhëna në procedurën paraprake, të merren si të lexuara. Në rast se mbrojtja e ka parë që ka interes që të dëgjohet ndonjë dëshmitar, deklarata e të cilit është marrë si e lexuar, kur i vjen radha mbrojtjes mundet me propozu si dëshmitar të vet, dhe t’ia marrë dëshminë për ato pjesë të dëshmisë të cilat shkojnë në favor të mbrojtjes”, tha Amer Alija nga Fondi për të Drejtën Humanitare.
E ndryshe veproi trupi gjykues me kërkesën e mbrojtjes që disa dëshmitarë të prokurorisë, të rikthehen për të dëshmuar.
“Trupi Gjykues hodhi poshtë kërkesën e Mbrojtjes së Thaçit që gjykata të detyrojë Prokurorinë të thërrasë dy dëshmitarë për të cilët Prokuroria kishte kërkuar t’i hiqte nga lista e dëshmitarëve të vet në shtator të vitit të kaluar”.
Reduktimet e tilla të numrit të dëshmitarëve, konsiderohen se shkojnë në favor të të akuzuarve.
Deri në muajin prill, ZPS-ja llogaritet që ta përfundojë çështjen e saj, duke vazhduar procesi më tej me ekipën e viktimaveve dhe ekipet mbrojtëse.
