Oda e Farmacistëve të Kosovës (OFK) ka ftuar ministrin e Shëndetësisë, Arben Vitia që të pezullojë menjëherë vendimin për çmimin e barnave.
Sipas OFK-së ky vendim ka shkaktuar krizë në sistemin shëndetësor dhe tregun farmaceutik, si dhe ka cënuar shërbimin cilësor shëndetësorë të qytetarëve.
Oda e Farmacistëve të Kosovës po ashtu ka bërë të ditur se vazhdimisht është duke pasur presion nga anëtarët e saj dhe qytetarët për problemet që po hasen në mungesë të barnave esenciale.
“Oda e Farmacistëve të Kosovës (OFK) shpreh shqetësimin e thellë lidhur me mungesën e barnave, përfshirë ato esenciale në sektorin publik dhe private, që ka shkaktuar krizë në sistemin shëndetësor dhe po cënon shërbimin cilësor shëndetësorë të qytetarëve , krizë kjo që ka lindur si pasojë e vendimi të Ministrit të Shëndetësisë për çmimin e barnave. OFK vazhdimisht është duke pasur presion nga anëtarët tanë dhe qytetarët për problemet që po hasen në mungesë të barnave esenciale, të cilat janë jetike për shëndetin e pacientëve dhe për funksionimin normal të sistemit shëndetësor. OFK me kohë ka paralajmëruar Ministrin e Shëndetësisë shumë para nxjerrjes së vendimit se një metodë e tillë e punës do të shkaktoj këtë kaos në tregun farmaceutik duke cënuar edhe sigurinë e qytetarëve tanë. OFK konsideron se këto vetëm janë rezultatet e para të kësaj krize e cila vetëm sa do të vij e përkeqësohet.
Në këtë kuadër, Oda e Farmacistëve të Kosovës bën thirrje urgjente për Ministrin e Shëndetësisë që, pas refuzimeve të përsëritura të ftesave tona për bashkëpunim, të vendosë interesin publik mbi interesat personale dhe të reflektojë për këtë situatë të rëndë.
OFK fton Ministrin e Shëndetësisë për hir të shëndetit të qytetarëve dhe për të shmangur përkeqësimin e mëtejshëm të situatës që të pezullojë menjëherë vendimin në fjalë, në mënyrë që të zgjidhen këto probleme të cilat tashmë veç janë hasur si pasojë e këtij vendimi, duke siguruar kështu furnizim të vazhdueshëm të tregut dhe qytetarëve me barna esenciale.
OFK si çdo herë siç ka shfaqur gatishmërinë e saj tash e 1 vit, është në gatishmëri 24 orëshe për ofrimin e zgjidhjeve MSH-së për eleminimin e këtyre problematikave profesionale.”, thuhet në reagim./teve1.info/
