Ministria e Jashtme e Austrisë ka reaguar pasi një pjesëtarë i Policisë së Kosovës është vrarë në fshatin Banjska të Zveçanit.
Kjo ministri ka thënë se e dënon fuqishëm sulmin e tmerrshëm kundër policëve të Policisë së Kosovës në veri.
“Dhuna duhet të ndalet menjëherë, autorët duhet të mbajnë përgjegjësi dhe të sillen para drejtësisë”, thuhet në reagimin e kësaj ministrie.
Ndryshe, Policia e Kosovës ka konfirmuar vrasjen edhe të dy pjesëtarëve të grupit të armatosur në veri, si dhe arrestimin e një tjetri të uniformaur dhe të armatosur.
“Sipas informatave zyrtare nga terreni gjatë shkëmbimit të zjarrit konfirmohet vrasja edhe e dy sulmuesve të tjerë, të cilët kanë qenë të maskuar, të uniformuar dhe të armatosur rëndë, e po ashtu konfirmohet edhe arrestimi i një sulmuesi të uniformuar dhe të armatosur. Si pasojë e sulmeve një zyrtar policor i PK-së ka pësuar lëndime kryesisht të lehta”, thuhet në komunikatë, përcjell teve1.info.
Më herët policia ka konfirmuar për vrasjen edhe të një personi tjetër të armatosur.