Përmes një komunikate, ME ka bërë të ditur se përdorimi i paautorizuar i energjisë elektrike, humbjet komerciale të KEDS-it gjatë vitit 2021 do të kushtonin deri në 110 milionë euro nëse do të bliheshin të gjitha me çmimet e importit.
“Përdorimi i paautorizuar i energjisë elektrike, humbjet komerciale të KEDS-it, pra vjedhjet e energjisë elektrike gjatë vitit 2021, do të kushtonin deri në 110 milionë euro nëse do të bliheshin të gjitha me çmimet e importit, ose thënë ndryshe, dy blloqet e Termocentralit “Kosova B” duhet të punojnë 31 ditë në vit për t’i mbuluar vetëm vjedhjet e energjisë elektrike. Ndërsa për vitin 2022 vjedhjet parashikohen të arrijnë deri në 99 milionë euro, nëse çmimi i energjisë nuk rritet më tej në bursat ndërkombëtare, apo 26 ditë pune të dy blloqeve të Termocentralit ‘Kosova B’”, thuhet ndër tjerash në njoftim.
Tutje, Ministria bën të ditur se janë duke marrë masa për të dhënë ndihmën e duhur në ndërprerjen e paautorizuar të energjisë elektrike së bashku me organet ligjzbatuese dhe KEDS-in.
“Në situatën e krijuar me furnizim me energji elektrike, Ministria e Ekonomisë është në komunikim të vazhdueshëm me institucionet përgjegjëse të furnizimit. Ne jemi duke ndërmarrë masa për të dhënë ndihmën e duhur në ndërprerjen e përdorimit të paautorizuar të energjisë elektrike së bashku me organet ligjzbatuese dhe kompaninë e distribuimit të energjisë elektrike, KEDS, e cila e ka për detyrë sipas kontratës së privatizimit që t’i ndalë ato”, thuhet në njoftim.
