Ministri i Mbrojtjes, Ejup Maqedonci në margjina të forumit Defense24 që u mbajt në Poloni, ka takuar zëvendësministrin e Lituanisë, Žilvinas Tomkus, zëvendësministrin e Koresë së Jugut, Sung IL, ish ministrin e Mbrojtjes të Polonisë si dhe anëtarin e Parlamentit, Mariusz Błaszczak.
Maqedonci përmes një postimi ka shkruar se me Sung IL kanë diskutuar për bashkëpunim ushtarak ndërmjet Kosovës dhe Koresë së Jugut.
Ndërsa, me zëvendësministrin e Lituanisë, Žilvinas Tomkus, ka diskutuar për bashkëpunim ndërmjet të dyja shteteve, dhe gjithashtu vazhdimin e bashkëpunimit në kuadër të Grupit për Mbrojtjen e Ukrainës si pjesë e Koalicionit të Deminimit.
Po ashtu, ministri ka vizituar shtandet e kompanive prodhuese të industrisë së mbrojtjes të cilat prezantonin produktet e teknologjisë së fundit.
Ndryshe, Maqedonci tha se në tre vitet e fundit ka investuar në ngritjen e kapaciteteve të ushtrisë së Kosovës, sipas tij, më shumë se pesëmbëdhjetë vitet e kaluara.
“Në tre vitet e fundit kemi investuar në ngritjen e kapaciteteve të ushtrisë sonë shumëfish më shumë se pesëmbëdhjetë vitet e kaluara. Do të vazhdojmë investimin në përputhje me planin operacional, kërkesat dhe nevojat e Forcës së Sigurisë së Kosovës. Që nga viti 2025 do të hyjmë në fazën e tretë të implementimit të PGJT-së. Fazë tjetër, investime të reja”, ka shkruar Maqedonci./teve1.info/
