Ministri i Brendshëm i Maqedonisë së Veriut, Oliver Spasovski, ka dhënë sot detaje rreth vrasjes së 14-vjeçares nga Shkupi dhe 74-vjeçarit i cili u gjet i vrarë në afërsi të Velesit.
Sipas tij dyshohen pesë persona, tre prej të cilëve janë në paraburgim, një në bisedë informative dhe një jashtë shtetit, raporton Alsat.
Spasovski ka thënë se është ndaluar edhe babai i të miturës për bisedë informative.
|Që të dy personat edhe e mitura nga Shkupi dhe 74-vjeçari nga Velesi dje u gjetën nga policia të vrarë dhe të varrosur njëri në Shkup dhe tjetri në Veles. Masat e ndërmarra nga ana e policisë na sollën deri tek autorët e këtij krimi, ata janë privuar nga liria. Lidhur me dy rastet janë të dyshuar 5 persona, tre prej tyre janë në paraburgim, një është jashtë shtetit dhe personi i 5, babai i të miturës është ndaluar dhe me të po zhvillohet bisedë informative”, ka thënë Spasovski në konferencë për media.
Ai ka thënë që motivi i të dy vrasjeve ka qenë interesi, ku në një rast është përfshirë edhe një person nga familja më e afërt e viktimës.
“Një prej personave, në marrëveshje dhe në dijeni, sipas konstatimeve fillestare, të një familjari ka organizuar ekzekutimin e krimit, me qëllim zhvatjen e parave nga nëna e të miturës, nga të cilat të gjithë personat e përfshirë do të përfitojnë financiarisht”, ka thënë ai.