Ministri i Administrimit të Pushtetit Lokal në Qeverinë e Kosovës, Elbert Krasniqi, ka pritur të premten kryetarët e dhjetë komunave me shumicë serbe për të diskutuar koordinimin e përgjegjësive institucionale mes nivelit qendror dhe atij lokal.
Në këtë takim, Krasniqi ka thënë se Qeveria dhe MAPL janë të gatshme të ofrojnë ndihmë dhe mbështetje për zgjidhjen e problemeve që ndikojnë direkt në qytetarë.
Ai gjithashtu ka theksuar se takimet e tilla përbëjnë një forum të rëndësishëm për komunikim dhe koordinim me të gjitha 38 komunat e Kosovës.
“Takimet e radhës me agjenda konkrete e të detajuara do të vazhdojnë, në interesin më të mirë të qytetarëve të Republikës, përmes bashkëpunimit të nivelit qendror dhe atij lokal”, ka njoftuar Krasniqi.
