Ministri i Jashtëm turk, Hakan Fidan, theksoi se problemi kryesor në rajon është politika ekspansioniste e Izraelit, duke përmendur dy arsye kryesore që qëndrojnë pas kësaj politike.
Sipas Fidan, qëllimi i parë i Izraelit është zgjerimi i territorit për të krijuar një “Izrael të Madh”, ndërsa i dyti është përpjekja për të dobësuar dhe fragmentuar vendet fqinje dhe rajonale.
Ai bëri këto deklarata gjatë një interviste me Al Jazeera dhe Qatar TV, menjëherë pas pjesëmarrjes në takimin e ministrave të jashtëm për të vendosur axhendën e samitit të jashtëzakonshëm të Organizatës së Bashkëpunimit Islamik dhe Ligës Arabe.
Fidan theksoi se Siria është një nga vendet më të prekura nga kjo politikë, dhe shtoi se Turqia ndjek nga afër zhvillimet dhe sulmet që synojnë këtë vend. Ai gjithashtu përmendi vendet e tjera si Libani, Egjipti dhe Jordania, me të cilat ka kontakte të ngushta.
Ministri turk shpjegoi se plani rajonal i Izraelit filloi me pushtimin e tokave palestineze dhe ka evoluar me kalimin e kohës, duke përfshirë jo vetëm pushtimin dhe gjenocidin në Gaza, por edhe ekspansionizmin që përbën një kërcënim serioz për vendet e rajonit.
Fidan bëri thirrje që komuniteti ndërkombëtar të fokusohet në sulmet e fundit të Izraelit, përfshirë edhe ato ndaj vendeve të tjera arabe dhe islame, duke përmendur shembullin e sulmit në Doha.
Ai theksoi se problemi nuk është vetëm çështja palestineze, por edhe politika ekspansioniste e Izraelit, dhe se vendet arabe dhe islamike duhet të bashkohen për të gjetur zgjidhje ndaj kësaj sfide.
Fidan paralajmëroi se vendet arabe, islame dhe komuniteti ndërkombëtar duhet jo vetëm të identifikojnë këtë problem, por edhe të mobilizohen për t’i dhënë përgjigje, citon Anadolu.
Në lidhje me marrëdhëniet me SHBA-në, Fidan vuri në dukje se Turqia dhe vendet e Gjirit kanë marrëdhënie të mira me Uashingtonin, por kritikoi politikën amerikane ndaj Izraelit, të cilën e përshkroi si një “përjashtim të veçantë” që dominon mbi të gjitha marrëdhëniet e tjera.
Kjo sipas tij ka dëmtuar ndikimin dhe pozicionin e SHBA-së në rajon dhe ka krijuar vështirësi për aleatët e saj dhe për vetë Shtetet e Bashkuara.
