Ministri i Punëve të Jashtme të Kroacisë, Gordan Grlic Radman, në sesionin e Asamblesë Parlamentare të Këshillit të Evropës në Strasburg deklaroi se anëtarësimi i Kosovës në Këshill është i rëndësishëm për stabilitetin dhe të drejtat e të gjitha komuniteteve.
Ai vlerësoi se pranimi i Kosovës në Këshillin e Evropës do të përmbushte misionin themelor të promovimit të demokracisë, të drejtave të njeriut dhe sundimit të ligjit në të gjithë Evropën.
“Pranimi i Kosovës në Këshillin e Evropës, sipas mendimit tonë, do ta përmbushte misionin themelor të promovimit të demokracisë, të drejtave të njeriut dhe sundimit të ligjit në të gjithë Evropën”, deklaroi ai.
Përveç kësaj, Kosova, sipas tij, përfaqëson një mundësi strategjike drejt forcimit të vlerave evropiane në të gjithë kontinentin.
“Përfshirja e Kosovës do të eliminonte një boshllëk të madh në mbulimin territorial të Këshillit të Evropës, duke siguruar standarde të barabarta evropiane të të drejtave të njeriut në të gjithë Ballkanin Perëndimor”, deklaroi Radman.
Radman, ndër të tjera, u ndal edhe te Ballkani Perëndimor, duke theksuar se promovimi i stabilitetit rajonal dhe marrëdhënieve të mira fqinjësore përfaqëson parime udhëheqëse të Bashkimit Evropian.
Në këtë kontekst, ai përshëndeti përparimin që, sipas tij, kanë arritur Shqipëria dhe Mali i Zi në rrugën e tyre drejt BE-së muajt e fundit.
“Ne i inkurajojmë ata, si dhe vendet e tjera të rajonit, që të mbeten të përqendruara dhe të vazhdojnë me përmbushjen e detyrimeve të tyre”, deklaroi ai./teve1.info/
