Zyrtarët ukrainas dhe evropianë akuzuan të mërkurën presidentin rus Vladimir Putin se ka shfaqur një interes të rremë ndaj përpjekjeve për paqe, pasi pesë orë bisedime me të dërguarit e SHBA-së në Kremlin nuk prodhuan asnjë shenjë përparimi, megjithëse pritet që negociatat të vazhdojnë.
Putin u takua të martën vonë në Moskë me të dërguarin e Presidentit të SHBA-së, Donald Trump, Steve Witkoff, si dhe me dhëndrin e tij, Jared Kushner.
Takimi përfaqësoi një hap tjetër në përpjekjen e ripërtërirë të SHBA-së për të ndërmjetësuar një marrëveshje paqeje, e cila ka rezultuar e paarritshme që nga rikthimi i Trump në detyrë në janar.
Palët ruse dhe amerikane ranë dakord të mos zbulojnë përmbajtjen e diskutimeve, por mbetet të paktën një pengesë madhore për një zgjidhje – çështja nëse Rusia do të mbajë zonat e Ukrainës që ka pushtuar që nga shkurti i vitit 2022.
Yuri Ushakov, një këshilltar i lartë i Putinit, u tha gazetarëve se “deri më tani, nuk është gjetur një kompromis” për çështjen territoriale, pa të cilin, sipas tij, Kremlini “nuk sheh zgjidhje për krizën”, citon Associated Press.
Edhe Ukraina e ka përjashtuar mundësinë e heqjes dorë nga territori i pushtuar nga Rusia.
Ushakov e përshkroi bisedën me zyrtarët amerikanë si “mjaft të dobishme, konstruktive, mjaft thelbësore”, por shtoi se ishte diskutuar vetëm korniza e propozimit të paqes të SHBA-së dhe jo “formulimi specifik”.
Para bisedimeve në Kremlin, Putin kritikoi ashpër rolin e Evropës në negociata, duke akuzuar vendet europiane se kërkojnë të sabotojnë një marrëveshje.
Ministrat e jashtëm të vendeve evropiane të NATO-s, të mbledhur në Bruksel, shfaqën pak durim ndaj Moskës.
“Ajo që shohim është se Putini nuk ka ndryshuar asnjë kurs. Ai po shtyn më agresivisht në fushën e betejës”, deklaroi Ministri i Jashtëm estonez, Margus Tsahkna. “Është mjaft e qartë se ai nuk dëshiron të ketë asnjë lloj paqeje.”
Sekretari i Përgjithshëm i NATO-s, Mark Rutte, pohoi se partnerët e Ukrainës do të vazhdojnë të ofrojnë ndihmë ushtarake për të siguruar që presioni ndaj Moskës të ruhet.
