Pas rritjes së çmimeve të produkteve esenciale, Inspektorati i Tregut ka mbyllur dy depo të operatorëve ekonomik.
Sipas njoftimit të Ministrisë së Industrisë, Ndërmarrësisë dhe Tregtisë njëra depo në Fushë Kosovë e tjetra në Graçanicë janë mbyllur përkohësisht.
E këto shkelje, i ka njoftuar edhe Dogana e Kosovës. Sipas tyre, vaji që u shit me çmim prej 3 euro e 49 cent, u importua në vlerë prej 1.22 cent deri në 1.45 cent.
Mirëpo pavarësisht mbylljes së tyre dhe dënimit të disa marketeve me gjobë,qytetarët thonë se nuk është e mjaftueshme.
Sipas tyre, dëmet që iu kanë shkaktuar me rritje të menjëhershme nuk mund të kompensohen.
Ata bëjnë thirrje të mos ndalet inspektimi, pasi që kjo rritje po vazhdon ende.
Si të pamjaftueshme gjobat po i sheh edhe ish-kryetari i Autoritetit Kosovar të Konkurrencës Valon Prestreshi. Ky i fundit thotë se vetëm AKK-ja do të ndërmerrte shumë më shumë masa.
Gjatë ditës, Tëvë1 ka kontaktuar edhe me zyrtarë të Ministrisë së Tregtisë, për të parë nëse ka vazhduar inspektimi, mirëpo të njëjtit nuk kanë dhënë detaje.
Raporti i gazetares Fetije Kamberi.
