Është dita e fundit e muajit korrik.
Por Mensur Tupelli i cili tash e 5 vite punon si minator ende nuk e ka marrë pagën e muajit qershor.
Kjo gjendje i ka rënduar jetesën këtij minatori i cili mban 6 anëtarë të familjes.
“Vështirë se jemi në kredi, 60% të pagës e kemi në kredi, 90% të minatorëve janë në kredi,edhe bukën duhet me ble vetë më parë tona, po është problem, gjysma e minatorëve nuk kanë mundësi me ble as bukë. Krejt minatorët frigoriferët thatë i kanë nuk kanë çka hajn tu e shty me borxhe”, shprehet ky minator.
Por jo vetëm Tupelli, pagë nuk kanë marrë qindra minatorë të tjerë në minierën e Stan Tërgut.
Për këtë arsye, tash e 22 ditë ata bojkotuan punën.
Madje të mërkurën, sindikata e minatorëve së bashku me menaxhmentin e kësaj ndërmarrje patën një takim, por nuk pati asnjë zgjidhje për situatën.
“Nuk ka diçka të re, është dashur të punojmë, e kemi qu një draft plan e kështu më radhe por minatori është duke kërkuar pagën gjendja është e rënduar e të gjithë minatorëve pasi po hyjmë në muajin e tretë ku të gjithë punonjësit presin ta marrin pagën e muajit korrik, kurse minatorët nuk e kanë marrë ende të muajit qershor e që është edhe me e keqja brenda pagës edhe pagesa e shujtës se minatorit”, ka thënë Fevzi Ademi nga Sindikata e Minatorëve të Trepçës.
Drejtori i Minierës së Stan Tërgut, tha se vonesat po bëhen për shkak të gjendjes së rënduar financiare.
Por këta po presin që bordi së bashku me Qeverinë e Kosovës të miratojnë planin operativ i cili parasheh daljen nga kriza.
“Unë prej paslufte dhe mas luftës kam punuar por një situatë të tillë asnjëherë nuk e kemi parë në këtë gjendje. Plani parasheh që për 5 muajt e ardhshëm mos me pas vonesa në pagë, me i kthy na normalitet të punës dhe kanal dale me kthy punës”, tha Shyqyri Sadiku- drejtor i minierës së Stan Tërgut.
Brenda një ditë sipas drejtorit të minierës Trepça, për shkak të ndërprerjes së punës, po humbasin rreth 40 mijë euro.
