Do duhej të ishin në thellësi të minierës në krye të detyrës.
Por minatorët e Trepçës, tash e 13 ditë po qëndrojnë në grevë, shkak i vonesës së pagave.
Ata thonë që ende nuk kanë marrë pagat e muajit qershor.
E të dëshpëruar nga kjo situatë, po kërkojnë zgjidhje nga menaxhmenti.
“E kena zgjidhjen, qite pagën hina n’punë. Shumë e thjeshtë është kjo. Qe 53 ditë pa pagë, edhe na kena familje edhe na kena t’drejtë me jetu sikur krejt populli. Me ni nënshkrim vijnë deputetët serb, e merr rrogën gjashtë muj ditë ja qet, na kena punu, po e lypim të drejtën tonë”, tha Fahrudin Imani, minator
“Edhe pak ditë futemi në muajin gusht, ne ende nuk i kemi marrë pagat e muajit qershor. Kemi kërku prej menaxherit sqarim, të vetmin sqarim që na ka dhënë është se pare nuk ka, ndaç punoni ndaç mos punoni. Jemi të shqetësum për këtë arsye, familje kemi, telashe prej ma të ndryshmeve, shumë telashe na ka shkaktu vonesa ose mos-dhënia e pagave”, tha Ali Peci- xehetar.
Minatorët kërkojnë të drejtën e tyre për punën e bërë në Minierën e Stantërgut.
E ndonëse ka rreth dy javë që janë në grevë, sipas Sindikatës së Punëtorëve të Trepçës, vetëm një herë u vizituan nga menaxhmenti.
Madje këta thonë që nuk kanë marrrë as ushqim për më shumë se një muaj.
“Dmth qe 54 ditë këta është dashtë të marrin ushqimin, kurse tash as ushqim nuk kanë në minierë sepse shujta është me pagë. Ditën e nëntë ka ardhë menaxheri, edhe ka thënë nuk kam datë, nuk di kur del paga, më nuk kemi asnjë komunikim”, tha Fevzi Ademi nga Sindikata e Punëtorëve të Trepçës.
“Nuk qëndron ajo çfarë thonë minatorët që nuk ka dalë rroga qe 53-54 ditë, pasi që paga e fundit është marrë me 28 qershor, ndërsa për pagat e muajit qershor që dmth do të duhej të ekzekutoheshin nga një deri me 10 i bie që dikund rreth 23 ditë nuk i kanë marrë pagat”, thuhet nga menaxhmenti.
Ata i bënë i thirrje minatorëve që të kthehen në punë dhe thonë që këto probleme i kanë të trashëguara me vite.
“Ju bëjmë thirrje minatorëve që të kthehen në vendet e tyre të punës që t’i lihet hapësirë menaxhmentit dhe gjithë partnerëve të tjerë për ta zgjidhur çështjen e pagave dhe çdo problematikë tjetër që e shoqëron Trepçën tash e sa vite. Problemet që e kanë sjellë Trepçën në këtë situatë të cilën jemi do të thotë në një situatë mjaft të pafavorshme janë përveç mungesës së investimeve të cilat nuk janë bërë ndër vite, poashtu edhe probleme të trashëguara prej menaxhmentit në menaxhment”, u shpreh Donika Osmani nga menaxhmenti i Trepçës.
Humbjet ditore sipas Sindikatës së Punëtorëve në Trepçë nga mos-puna e minatorëve janë dhjetëra mijëra euro.
