Futbollisti i Kombëtares së Kosovës, Milot Rashica mund të ndërroj ekip por jo edhe kampionat.
Mediumet në Turqi, kanë raportuar të mërkurën se Rashica mund të largohet nga skuadra e Beshiktashit në janar për t’u transferuar te Trabzonspori.
Mësohet se trajneri i Trabzonsporit, Shenoll Gynesh, është ai që po e kërkon me ngulm transferimin e Rashicës, me të cilin ka punuar te Beshiktashi.
Gynesh ka bërë të ditur se Trabzonspori është në kërkim të një sulmuesi të krahut në janar dhe thuhet se Rashica është synimi i tij.
Rashica 28-vjeçar është pjesë e Beshiktashit prej vitit të shkuar dhe me këtë skuadër ka kontratë deri në verën e vitit 2027.
Këtë sezon, Rashica ka shënuar 1 gol dhe ka bërë 5 asistime në 18 ndeshje të luajtura për Beshiktashin në të gjitha garat.
Para Beshiktashit, Rashica ka qenë pjesë edhe e Galatasarayt dhe te Trabzonspori po shihet si përforcim i duhur për repartin e sulmit.
