Klubi slloven NK Celje ka zyrtarizuar afrimin e mesfushorit kosovar Milot Avdyli, i cili vjen nga skuadra ukrainase Vorskla Poltava. 21-vjeçari ka firmosur kontratë afatgjatë me kampionët në fuqi të Sllovenisë, që do ta mbajë në ekip deri më 30 qershor 2028.
Avdyli bëhet kështu përforcimi i katërt i Celjes në këtë merkato verore. Ai është një mesfushor polivalent, që mund të luajë në të gjitha rolet e repartit qendror, dhe konsiderohet një element me potencial të madh për të ardhmen.
Karrierën e tij futbollistike e nisi te KF Kurda, më pas kaloi te KF Trepça ’89, ku u dallua gjatë sezonit 2020/21. Aftësitë e tij u vërejtën nga skautët e klubit zviceran FC Aarau, i cili e transferoi në shkurt të vitit 2021.
Gjatë katër sezoneve në Zvicër, Avdyli zhvilloi plot 109 ndeshje, duke realizuar 7 gola dhe dhënë 10 asistime. Në janar të këtij viti ai u transferua në Ukrainë, ku gjatë gjysmës së dytë të sezonit grumbulloi 10 paraqitje me Vorskla Poltava.
Milot Avdyli është një lojtar i rregullt i përfaqësueses U21 të Kosovës, dhe ka qenë pjesë edhe e të gjitha moshave të tjera të kombëtares kosovare.
