Golin e shënuar kundër Portugalisë, sulmuesi i Gjeorgjisë do ta mbajë në mend gjatë tërë karrierës së tij, ndërsa pas “Euro 2024” Georges Mikautadze do ta tërheq vemendjen e skuadrave të mëdha evropiane.
Pas përfundimit të fazës së grupeve të “Euro 2024”, Mikautadze është golashënuesi më i mirë pasi ka realizuar 3 gola në po aq ndeshje të luajtura.
Golin e tij të tretë, Mikautadze e shënoi nga penalltia kundër Portugalisë, ndeshje të cilën Gjeorgjia e fitoi 2:0 për të avancuar në 1/8 e finales.
Me 3 gola dhe 1 asistim, Mikautadze është edhe lojtari më me ndikim në tri ndeshjet e para të Kampionateve Evropiane.
Mbi të gjitha, Mikautadze është bërë vetëm lojtari i nëntë që ka shënuar gol në secilën ndeshje të fazës së grupeve dhe është i vetmi në “Euro 2024” që deri më tani ka tri gola.
Gjeorgjia në 1/8 e finales do të përballet me Spanjën, ndërsa Mikautadze që bën karrierë te Metzi në Francë do të jetë rreziku më i madh për ekipin e trajnerit Luis de la Fuente.
