Autore: Jona Kelmendi
Është objekt fetar në Kishnicë të Graçanicës.
Por, rreth orës 03:00 të mëngjesit të së dielës, pati mysafirë të padëshiruar.
Kjo meqë, dikush u fut me forcë brenda xhamisë “Sheh Haxhi Bajrami”, e cila u shërben besimtarëve mysliman të komunitetit rom.
E nga aty, nuk dolën duarthatë.
Se dikush i vodhi paratë e grumbulluara nga xhematlinjtë u kuptua vetëm disa orë më pas.
Imami i kësaj xhamie, nuk pranoi të flasë para kamerës.
Krejt kjo, me arsyetimin se personat e dyshuar, nuk i kishte parë vet.
Por për këtë rast, e njoftuan Policinë e Kosovës.
Këta të fundit, dolën në vendngjarje.
“Është raportuar se persona të panjohur me përdorim force kanë depërtuar brenda në objektin fetar dhe nga aty kanë vjedhur rreth 70 euro para të grumbulluara nga besimtarët. Njësitë policore kanë dalë në vendin e ngjarjes dhe janë duke e hetuar rastin”, thuhet nga Policia e Kosovës.
Ndryshe, kjo nuk është hera e parë që ky objekt që shërben si xhami, bëhet cak i hajnave.
Në vitin 2021, nga po e njëjta arkë, ishte vjedhur shuma prej 20 eurosh.
Por, kjo xhami, nuk ishte caku i vetëm i hajduteve në 24 orët e fundit në Graçanicë.
Policia e Kosovës bëri të ditur se persona të panjohur, kanë vjedhur edhe dy trafo të energjisë elektrike në një fermë të pulave në këtë komunë.
