Microsoft ka prezantuar modelet e reja të kompjuterëve personal (PC) Surface, duke ofruar pajisje më të përballueshme dhe me performancë të përmirësuar, duke përfshirë Surface Pro dhe Surface Laptop, shkruan CNBC.
Në krahasim me vitin e kaluar, këto modele janë më të lira: Surface Laptop nis nga 899, 100 dollarë më pak se edicioni i kaluar, ndërsa Surface Pro fillon nga 799, 200 dollarë më pak.
Të dyja përmbajnë procesorin Snapdragon X Plus të Qualcomm, me tetë bërthama, dhe ekran më të vogël, 12 inç për Pro dhe 13 inç për Laptop.
Megjithëse ekranet janë më të vogla, Microsoft thotë se këto pajisje do të ofrojnë jetë më të gjatë baterie, deri në 16 orë për Surface Laptop, nga 13 orë vitin e kaluar.
Sistemet e reja mbështesin Windows 11 dhe ofrojnë mundësi të përmirësuara për kërkimin e skedarëve dhe veçori të tjera që përdorin Inteligjencën Artificiale (AI).
Gjithashtu, përdoruesit që kanë PC me Copilot+ do të mund të provojnë një agjent AI në aplikacionin e Cilësimeve që mund të bëjë ndryshime me fjalë të thjeshta, si “ikona ime e miut është shumë e vogël”.
Microsoft ka nisur para-porositë për këto pajisje më 2 maj, dhe ato do të dalin në shitje më 20 maj. Modelet do të jenë në ngjyrat platinium, oqean dhe vjollcë.
Megjithatë, analistët thonë se interesi për PC me AI është ende i kufizuar, për shkak të pasigurisë për vlerën që ato ofrojnë.
