Kryeministri i Maqedonisë së Veriut, Hristijan Mickoski, pas votimit në shkollën fillore “Dimo Haxhi Dimov” në komunën e Karposhit, njoftoi se deri tani procesi zgjedhor po zhvillohet në mënyrë të rregullt dhe pa shqetësime, duke shpresuar që ai të përfundojë në të njëjtën mënyrë.
Mickoski gjithashtu theksoi se pret shpalljen e një fitoreje të madhe historike për VMRO-DPMNE-në dhe koalicionin e saj.
“Nga informacionet që kam deri tani, mund të them se dita po kalon qetë, me dinjitet, ashtu siç pritej, në fakt ashtu siç janë edhe qytetarët maqedonas. Pres që edhe pjesa e mbetur e ditës të përfundojë në të njëjtën mënyrë dhe që me rezultatet të shpallim edhe një fitore të madhe historike për VMRO-DPMNE-në dhe koalicionin”, theksoi Mickoski në një deklaratë për mediat.
Në zgjedhjet lokale të 19 tetorit, në Maqedoninë e Veriut, marrin pjesë 22 parti, 19 koalicione dhe 119 kandidatura të pavarura.
Votimi do të zhvillohet në 3.474 qendra votimi për 309 kandidatë për kryetar komunash dhe 576 lista për këshillat komunale me gjithsej 10.490 kandidatë.
Qyteti i Shkupit ka më shumë kandidatë për kryetar bashkie – 16.
