Lionel Messi pati një mbrëmje të veçantë dhe të paharrueshme me kombëtaren e Argjentinës, në atë që u cilësua si ndeshja e tij e fundit në tokën argjentinase me fanellën Albiceleste. Legjenda e futbollit e shënoi këtë moment me një dopietë dhe fjalë të fuqishme që preknin zemrat e miliona tifozëve.
Para fillimit të ndeshjes, Messi solli tre djemtë e tij në fushë për të kënduar himnin kombëtar, ndërsa gjatë nxehjes nuk i fshehu emocionet dhe derdhi disa lot. “Të përfundoj kështu, është gjithçka që kam ëndërruar,” u shpreh ai pas përfundimit të takimit.
Argjentina mposhti Venezuelën me rezultatin 3-0 në një atmosferë madhështore, ku Messi shënoi në minutat 39’ dhe 80’, ndërsa Lautaro Martínez vulosi fitoren në minutën e 76’. Me këto gola, kapiteni i Argjentinës e çoi në 36 numrin e golave të tij në kualifikimet e Kupës së Botës në Amerikën e Jugut, duke mbetur golashënuesi më i mirë i të gjitha kohërave në këtë garë.
Edhe pse Kombëtarja kampione bote e vitit 2022 e ka siguruar tashmë kualifikimin për Kupën e Botës 2026, Messi konfirmoi se nuk do të udhëtojë për ndeshjen e fundit ndaj Ekuadorit. “Kam biseduar me Scaloni-n dhe vendosëm që të pushoj. Edhe pse ndjehem mirë pas dëmtimit, preferuam të shmangim një tjetër ndeshje e udhëtim,” tha ai.
E ardhmja e Messit në futbollin ndërkombëtar mbetet e paqartë. Ai nuk ka dhënë ende një datë të saktë për pensionimin, por kualifikueset e Botërorit 2030 do të nisin në vitin 2027, kur ai do të jetë 40 vjeç.
Një gjë është e sigurt: askush nuk është gati ta shohë Messin të largohet. Dhe në këtë mbrëmje të fundit në Argjentinë, ai la një trashëgimi që do të kujtohet gjithmonë.
