Në një intervistë të gjatë për “Simplemente Futbol”, Leo Messi ka ndarë disa reflektime të thella për të ardhmen e tij, figurat që kanë ndikuar në karrierën e tij dhe brezin e ri të futbollit që po shkëlqen në arenën ndërkombëtare.
Kapiteni i Argjentinës, i cili ka fituar gjithçka në futboll, ka pranuar se mendimet për Kupën e Botës 2026 janë të pranishme çdo ditë.
“Ky vit do të jetë kyç për të parë çfarë do të vendos në lidhje me Kupën e Botës 2026,” – tha Messi, duke shtuar: “Do të gënjeja po të thosha që nuk po mendoj për këtë…”
Messi, i cili do të jetë 39 vjeç në momentin kur do të mbahet turneu në SHBA, Kanada dhe Meksikë, nuk ka marrë ende një vendim përfundimtar, por ka lënë të hapur mundësinë që mund të jetë pjesë e atij edicioni historik.
Ylli argjentinas nuk ka nguruar të flasë me admirim për ish-trajnerin e tij te Barcelona, Pep Guardiola, me të cilin krijoi një nga ekipet më të mëdha të të gjitha kohërave.
“Pep Guardiola është nga një tjetër botë. Ai është ndryshe, sheh gjëra që askush tjetër nuk i sheh. E ndryshoi futbollin. Të gjithë donin të na kopjonin. Në fakt, në një farë mënyre i bëri dëm futbollit, sepse njerëzit u përpoqën të luanin si Barcelona jonë”, tha Messi.
Në një deklaratë të sinqertë, argjentinasi ka zbuluar se rikthimi te Barcelona, klubi ku u bë legjendë, ishte një dëshirë e madhe, por sërish e parealizueshme.
Pas ndarjes emocionale nga Barça në vitin 2021 dhe një periudhe dyvjeçare te Paris Saint-Germain, shumë tifozë kishin shpresuar për një rikthim të tij në “Camp Nou”. Por, sipas vetë yllit argjentinas, rrethanat nuk e lejuan një gjë të tillë.
Messi shtoi se vendimi për të mos iu bashkuar një tjetër klubi evropian erdhi si rezultat i reflektimeve familjare dhe ndikimit të sukseseve më të mëdha në karrierë.
“Pas kësaj, u bë një vendim familjar. Fakti që fituam Kupën e Botës pati gjithashtu një ndikim të madh. E kisha të qartë që nuk doja të isha në një skuadër tjetër në Evropë, nuk doja të shkoja te asnjë prej tyre.”
