Të martën, në selinë e Federatës së Futbollit të Kosovës (FFK), është tërhequr shorti për çiftet gjysmëfinale të Kupës së Kosovës.
Ndeshjet pritet të jenë interesante, por Drita – Prishtina, vlerësohet si finale para finales.
Në fakt, kjo përballje në gjysmëfinale të Kupës së Kosovës pritet ta ketë vëmendjen kryesore duke pasur parasysh se Drita po marshon drejt titullit të kampionit kurse Prishtina triumfin në Kupë e ka si mundësi për të siguruar daljen në Evropë.
Ndeshja e parë mes këtyre dy skuadrave do të luhet në Gjilan kurse ajo e kthimit në Prishtinë, pasi në fazën gjysmëfinale do të luhen dy ndeshje për t’u përcaktuar finalisti.
Ndërkohë, gjysmëfinalja tjetër do të jetë ajo ndërmjet Llapit dhe Drenicës, me ndeshjen e parë që do të luhet në Podujevë dhe të kthimit në Skenderaj.
Ndeshjet e para gjysmëfinale do të luhen më datën 9 prill kurse ato të kthimit më 23 prill.
