Në muajt e ardhshëm të këtij viti, mësimdhënësit në Kosovë rrezikohen të mbesin pa paga. Kjo për shkak se komunat nuk do të kenë buxhet të mjaftueshëm për të paguar. Nga Sindikata e Bashkuar e arsimit thonë se kjo po ndodhë pasi komunat nuk kanë bërë planifikimet e duhura për shpenzimet që rrjedhin nga kontrata kolektive derisa kanë paralajmëruar edhe grevë. Ndërsa nga Asociacioni i Komunave të Kosovës thonë se kjo po ndodhë për shkak të kontratës kolektive.
Mësuesit e komunës së Vushtrrisë rrezikohen muajin e ardhshëm të mos paguhen për punën që bëjnë.
Kjo pas komuna nuk ka para të paguaj mësimdhënësit e ciklit fillor.
Drejtori i arsimit në këtë komunë, ka thënë se kjo është për shkak të kontratës kolektive e cila i ka kushtuar miliona euro buxhetit komunal.
“Ne si DKA e arsimit me konkretisht si Komunë e Vushtrrisë kemi pranuar një email nga Ministria e Financave të cilët paralajmërojnë që në muajt në vijmë mund të rrezikohen pagat e mësimdhënësve të ciklit fillore. Dihet fakti që kontrata kolektive gjegjësisht vendimet gjyqësore që ka prodhuar kontrata kolektive kanë krijuar pasoja financiare për komunën tonë për DKA-në, këto obligime financiare vetëm nga cikli fillore janë mbi 1 milionë e 400 euro.”, ka thënë Drejtori i Arsimit në Vushtrri , Albanez Tahiraj.
E jo vetëm në Vushtrri, edhe në komuna të tjera në Kosovë mësimdhënësit mund të mbesin pa paga.
Edhe nga Asociacioni i Komunave të Kosovës thonë se gjithë kjo situatë derivon nga kontrata kolektive.
“Mendoj që Qeveria e Kosovës nuk ka vullnet që ta bëjë zgjidhjen e kontratës kolektive dhe mjete janë tu marrë padrejtësisht komunave për investime kapitale si dhe nga kategoria e mëditjeve dhe pagave. Deri me tani komunave ju kanë marrë mbi 122 milionë euro për zbatimin e kontratës kolektive dhe tani në këtë tre mujorin e fundit pritet që komunat të përballen me probleme sa i përket kategorisë së pagave dhe mëditjeve. Pritet që komunat në ditë në vijmë të marrin paralajmërime edhe nga niveli qendore sa përket kësaj problematik” , ka deklaruar Sazan Ibrahimi.
Por kryetari i Sindikatës së Bashkuar thotë se ky problem është si pasojë e mos planifikimit të duhur buxhetor nga komunat.
“Ka tendenca aty këtu dhe kam dëgjuar kryetar të komunave për këtë situata të krijuar mundohen ti lënë fajin kontratës kolektive te arsimit dhe të shëndetësisë,mundohen që të paraqesin si problem këto kontrata që nukështë e vërteta faji është të dy nivelet e qeverisjes në Kosovë. Buxhet ka para në buxhet ka, obligi9mi i nivelit qendrore ka qene të ndihmojë komunave, komunat të mos vajtojnë për kontratën kontrata nuk e ka as një faj, kontrata është obligative dhe siguron benifete të caktuar për mësimdhënësit.” ka thënë Rrahman Jashari.
E në rast që nuk bëhet ekzekutimi i pagave, SBASHK e lë të hapur mundësin= edhe për greva.
“Po të na shtohet edhe kjo çështja e pagesës, atëherë unë kam frikë se punëtoret e arsimit që nga çerdhet deri në universitet do të jenë fillimisht në protestë para qeverisë e pastaj do të vendosin, e çka të vendosin unë do të jem në ballë të atyre angazhimeve mund të kem edhe grevë.”, ka thënë Jashari.
Vetëm nga mësimdhënësit në gjykatat e Kosovës janë dorëzuar 60 mijë lëndë që ndërlidhen me mos pagesat e obligimeve qe parashihen me kontratën kolektive.
