Emisari i BE-së për dialogun Kosovë-Serbi, Miroslav Lajçak dhe i dërguari i SHBA-së për Ballkanin Perëndimor, Gabriel Escobar, kanë dhënë mesazhe për kthim të qetësisë në veri dhe që Kosova dhe Serbia të përqendrohen në dialog.
Këto ata i kanë thënë pas takimit me kryeministrin e Kosovës, Albin Kurti.
Siç raporton gazetari i Tëvë 1, Shpat Blakçori i cili ka përcjellë këtë takim, Lajçak ka përsëritur kërkesën e përfaqësuesit të Lartë për të BE-së, Josep Borrell për zgjedhje të reja në veri dhe pjesëmarrjen e serbëve, duke thënë se takimi me Kurtin ishte i vështirë.
Lajçak para medieve tha se sonte në Prishtinë nuk ka ardhur për të diskutuar rreth dialogut por për zgjidhjen e një krize të re të krijuar.
“Sonte po vij në Prishtinë jo për të diskutuar për ecurinë e dialogut por për të zgjidhur një krizë të shkaktuar së fundi”, tha Lajçak.
Ndërsa, Escobar duke mbështetur deklarata e Lajçak , kërkoi që sulmuesit e trupave të KFOR-it në veri të Kosovës të dalin para drejtësisë.
Ai tha se shpreson që kërkesat e komunitetit ndërkombëtar të degjohen, duke shtuar se nuk ka parë kaq shumë unitet deri më tani si për këto kërkesa.
”Nëse mund të them një gjë, nuk kam parë kaq shumë të bashkuar në komunitetin transatlantik.Shtetet e Bashkuara, Bashkimi Evropian, NATO dhe pothuajse çdo mik tjetër i Kosovës ka bërë të njëjtën kërkesë identike. Pra, shpresoj se do të dëgjohemi.Ne dëshirojmë që Kosova të arrijë të gjitha aspiratat e saj. Ne jemi mbështetësi më i madh i sigurisë, pavarësisë, sovranitetit dhe integritetit tuaj territorial. Gjithçka që kërkoj është që të dëgjohemi, kërkesa jonë të dëgjohet”, tha ai.
Dy emisarët të cilët po qëndrojnë në Kosovë pas zhvillimeve të fundit në veri, të martën do të takohen me presidenten Vjosa Osmani dhe partitë opozitare në Kuvendin e Kosovës.