Në trup po mbajnë veshur uniformën më të shtrenjtë që ka shteti i Kosovës.
Entuziazmi për të mbrojtur atdheun shihej në fytyrën e secilit prej ushtarëve të rinj të republikës.
Ata njëzëri u zotuan se do i shërbejnë Kosovës duke mbrojtur cep më cep kufijtë e shtetit.
E kjo detyrë që sapo morën ia plotësoi atyre edhe një ëndërr të kamotshme.
Në mesin e rekruteve është edhe Bahtir Jahiri, i cili po vazhdon ëndrrën e babai të tij që ra heroikisht duke mbrojtur atdheun.
“Ndjenja e sotit është ndjenjë e veçantë pasi e kemi zgjedhë profesionin me fisnik, e kemi zgjedh uniformën e Forcës së Sigurisë së Kosovës është një ndjenjë e papërshkrueshme me fjalë. Këto nëntë javë kanë qenë sfiduese por sa kanë qenë sfiduese kanë qenë edhe shumë të mira për arsye se kemi mësuar shumë sene pasi kalimi nga jeta civile në jetën ushtarake nuk është aspak e lehtë, pasi ne kemi mësuar shumë sene për mbijetesë, kemi mësuar shume sene që jeta civile nuk ti mëson”, shprehet ajo.
Rrugëtimi ushtarak për 9 javën nuk ishte aspak i lehtë për këta ushtar të rinj.
“Është ndjenjë shumë e veçantë të shërbesh brenda kësaj uniforme. Nëntë javë trajnim kanë qenë shumë të vështira për neve nuk kanë qenë shumë me lehtë me ndihmën e përgjegjësve tanë që na kanë ndihmu me kalu këto sfida. Instruktorët kanë qenë shumë motivues për neve na kanë motivuar gjatë tërë kohës dhe jemi shumë krenar që gjendem tani këtu përball jush”, shprehet ushtarja e Leonora Gajtani.
E më pa durim diplomimin e tyre e priten ata që i rriten.
Të cilët mes përqafimeve e lotëve po iu urojnë rrugëtimin e ri fëmijëve të tyre.
“Mirë shumë jam i lumtur që kam pas mundësin me ja dhanë një djalë ushtrisë për mbrotje të atëdhetu e vatanit nëse është nevoja”, u shpreh një prind.
“Jemi të gëzueshme shumë që kanë arrit me kry këtë drejtim, jemi të kënaqur”, tha Mustaf Xani – familjar.
“Urime uniforma e ushtrisë së re inshallah e gëzojnë dhe e mbrojnë deri në fund. Djali ka pasur gjithë dëshirë e ka pas babën ushtar të UÇK-së, TMK-së dhe FSK-së edhe ai pati dëshirë të jetë ushtar”, shprehet Elizabeta Geci.
Në ceremoninë e diplomimit të ushtarëve të rinj u ndanë edhe lëvdata për rekrutet e dalluar si dhe për instruktorët me të përkushtuar.
