Një 34-vjeçar është arrestuar nga Policia e Kosovës pasi ka pranuar se ka vjedhur 24,800 euro nga banesa e babait të tij, i cili jeton jashtë vendit.
Sipas njoftimit të Policisë, rasti është raportuar më 19 tetor nga Sherif Nuredini, një mërgimtar nga Shtimja që jeton në Zvicër.
Rastin për Tëvë1 e ka raportuar edhe vetë viktima.
Ai kishte lajmëruar policinë pasi kishte vërejtur se paratë që i kishte ruajtur në banesë mungonin.
“Paret në momentin që e kam vërejtur është qitash me 19 tetor, e kur i kam lan është me 22 gusht, pra jam nis për Zvicër. Shuma totale ka qenë 25 mijë euro, prej tyre 200 i pata marrë dhe kanë mbetur 24 mijë e 800 euro. Këtë e kam vërejtur shumë vonë pasi në këto dy tri ditë nisna për Zvicër”, ka treguar Nuredini për Tëvë1.
Ai kishte ruajtur paratë në dollapin e dhomës, pasi planifikonte t’i përdorte për blerjen e mobileve të banesës së re që kishte blerë në të njëjtin kompleks.
65-vjeçari i kishte thënë televizionit, prapa kamerës se i dyshuari kryesor për këtë vjedhje ishte djali i tij.
Mirëpo për shkak të hetimeve ai nuk e kishte përmendur publikisht, pasi në banesë nuk ishin vërejtur shenja thyerjeje apo hyrje me forcë.
“Në bazë të informatave që kam unë nga fshati, dyshova në një të afërm familjar… por ai fillimisht nuk pranoi asgjë”, ka deklaruar ai.
Pas hetimeve, më 21 tetor, policia ka identifikuar dhe arrestuar të dyshuarin B.N., djalin e ankuesit, i cili në prani të avokatit mbrojtës ka pranuar kryerjen e veprës penale.
Policia ka bërë të ditur se rasti është cilësuar si “vjedhje e rëndë”, dhe në hetime janë përfshirë njësitë rajonale të hetimeve të Ferizajt.
Me urdhër të prokurorit të shtetit, i dyshuari është dërguar në ndalim policor për 48 orë, ndërsa hetimet lidhur me rastin po vazhdojnë. /teve1.info/
Mërgimtarit i avullohen 25 mijë euro nga banesa në Shtime, dyshon tek rrethi i ngushtë familjarë
